Dallot ti Panagyaman ken Panagserra iti Parang

(Sinurat para iti 2006 Nakem Centennial Conference Dumanonkayo Ceremonies, Nob. 9, 2006, UH Manoa, Hon, HI; indallot da Roxanne Taylan ken Chris Mallanao, agpada nga agad-adal iti UH Manoa)

Babai:
A, ta dallot, ay dalidallang
A, ta daldallot duminidallang
Ta intay ngarud itan saksian
Ti panagserra iti daytoy a parang
A, ta dallot, ay dalidallang
A, ta daldallot duminidallang

Lalaki:
Napintas a panaglilinnangen
Nakaay-ayo a laglagipen

Babai:
Daytoy a panagkammayet
Nabayag nga imbagbaga di saltek

Lalaki:
A no agsaltek ket kasla tumarektek
Nabayag nga impadto ti pusa

Babai:
A no aglana ket uray la nga
Ngem kakabsatmi ngarud ida

Lalaki:
Gagayyem a sangapada
Amin a naggapu iti sabali

Babai:
Sabali a lugar ken ili
Agyamankami kadakayo

Dueto:
Pagyamananmi ti panakidanggayyo
Kasta met a pangyamananmi
Ti gobernadora ti ili
No Gobernadora Linda Lingle
Nga immay nakiabrasa
Kasta met dagiti mamaingel
Ni Doktor Lumbera a pagtamdan
Iramantay ni Doktor Lilia
Tay Santiago ti apilyedona
Kasta met ni Doktor Marot
Dagiti sabsabong a kappuros
Flores ti apilyedona, babai a naemma
A, ta dallot, ay dalidallang
A, ta daldallot duminidallang


Lalaki:
Dagiti diputado ti ili
Isuda a nagdaliasat iti rabii

Babai:
Nagdaliasat iti rabii
Nga immay mangyeg kaasi

Lalaki:
Isuda a pagtamdan
Pagsakduan iti nakem

Babai:
Pagtawingan iti kinaimbag
Pannakaawat iti biag

Lalaki:
Dagiti mamaestra a kadua
Pagbulodan iti sanikua

Babai:
Daytay gameng iti panunot
Gameng a di marunot

Lalaki:
Dagiti mannurat a nakikappeng
Nga agparpatuat manen iti imahen

Babai:
Isuda dagitoy ti saksi
Ti ngayed ti taripnong

Dueto:
Daytoy a taripnong nga aglaylayon
Agtultuloy nga agnanayon
Isu ngarud a rekpantay itan
Daytoy a parang a kinayawan
Dagiti musa dagiti bantay
Iti Manoa nga agpayapayapay
Agyamankami ngarud, kakabsat
Kadagiti adu a ragragsak
Sapay ta daytoy ti rugi
Ti adu pay a panagilili
Panagpipingki dagiti utek
Panagsaltek ti bautek
Ti panagariangga ti saltek
Tapno ti regget maipasnek
Agimbag a rabiikamin
Ta ti bagi paginanaen


Dueto:
Naimbag a rabiiyo amin
Dakayo amin a gagayyem


A Solver Agcaoili
UH Manoa
Nob 2, 2006

Dallot ti Panagkararag ken Panagpadanon

(Sinurat para iti Dumanonkayo Ceremonies, 2006 Nakem Centennial Conference, Unibersidad ti Hawai`i iti Manoa, Honolulu, HI, Nobiembre 9, 2006, ken indallot da Roxanne Taylan ken Chris Mallanao, agpada nga agad-adal iti Unibersidad ti Hawai`i-Manoa)

1. Panagkararag

Babai:
A, ta dallot ay, dalidallang
A, ta daldallot duminidallang
Agrukbabtayo iti Namarsua
Iti sidongna mapantayo kenkuana
Ta isuna ti pakabuklan
Ti amin a kaipapanan
Sumurnadtayo a pinarsua
Datayo amin a sangapada
Ta daytoy ti rumbeng
Ti nasken nga aramiden
Ti panagtamed ti iringpasen
A, ta dallot ay, dalidallang
A, ta daldallot duminidallang

Lalaki:
A, ta dallot ay, dalidallang
A, ta daldallot duminidallang
Ti nasken nga aramiden
Ti pananglagiptay aminen
Kadagiti parabur a laklak-amen
Ta amin dagitoy ket aggapu
Iti nalabon nga ayat ti Apo
Ti namartuat iti biagtayo
Ti namartuat iti kiredtayo
Ti namartuat iti piatayo
Ti namartuat iti regtatay
A, ta dallot ay, dalidallang
A, ta daldallot duminidallang




Dueto:
A, ta dallot ay, dalidallang
A. ta daldallot duminidallang
Agtamedkami ngarud kenka ita
O Apo a bubon ti kararua
Dakami nga umar-araraw
Itdemkadakam ti rayray ti aldaw
Itdemkadakam ti bang-ar ti puso
Itdemkadakam ti lung-aw iti appupo
Itdemkadakam ti lag-an iti babantot
Itdemkadakam ti dur-as iti saklot
Tapno iti kasta ket malak-ammi ti daton
Nga inrantam kadakami a tallaong
A, ta dallot ay, dalidallang
A, ta daldallot duminidallang


2. Panagpadanon

Babai:
A, ta dallot ay, duminidallang
A, ta daldallot duminidallang
Kasta met nga inkam kablaawan
Dagiti amin a nagsangpet a pagayam
Gagayyem a mabigbig iti sabali nga ili
Madaydayaw ken malalaki
Dagiti dayag a nalalaing
Dagiti bisitami a nasanting
Amin dagitoy a kakaduami
Iti daytoy a taripnongmi
Ta dakkel a pakaidayawanmi
Ti pannakikammaysayo kadakami
Pannakikammaysa a pakalaglagipanmi
Pannakikammaysa a pakautanganmi
Pakautanganmi iti naimbag a nakem
A bayadenmi met iti naimbag a nakem
A, ta dallot, ay dalidallang
A, ta daldallot, duminidallang


Lalaki:
A, ta dallot, ay duminidallang
A, ta daldallot duminidallang
Dumanonkayo ngarud, apo
Sumrekkayo iti tallaongtayo
Kaduaendakami iti daytoy nga aramid
Rambakantayo daytoy a patawid
Ta daytoy a patawid ti bendision
Ta pakaigapuan daytoy a punsion
Daytoy a panagkakamammayet
Pannakaur-urnos ti kinasingpet
Panangisagut met iti sayaat
A kasingin ti pudno nga ayat
Ti ayat a nasudi ken natarnaw
Nga imulatay iti ballasiw-taaw
Tapno gibusantay ti pananglipat
Kandado ti lagip makeltat
A, ta dallot, ay dalidallang
A, ta daldallot dumininidallang

Dueto:
A, ta dallot ay dalidallang
A, ta daldallot duminidallang
Itedmin ngarud kadakayo amin
Ti panagtamedmi iti laing
Ti panangbigbigmi iti kananakem
Nakaim-imbag a kababalin
Amin dagitoy nga insangpetyo
Awatenmi amin a sipupuso
Sinanama iti panangipategyo
Dumanonkayo ngarud, apo,
Sumaklangkayo amin iti numo
Dispensarenyo ti nagtenganyo
Ta ti barukongmi ti sangladanyo
Ditoykayo a lumaem ken agindeg
Iti barukongmi ti subad a pammateg
Ti panagyaman a madagdagullit
Ti panagisem a nakasamsam-it
A, ta dallot, ay dalidallang
A, daldallot, duminidallang.

A Solver Agcaoili
UH Manoa, Nob 2/06