Zander, Ti Maingel
(Ken Zander Evangelista, iti itatao)
Maingelka a naitao iti tagainep, barok
Anak dagiti agregget a rikna ti amam
Ti inam ken dagiti aminen a pasamak
Iti biag man wenno iti pagbabakalan
Iti ibit kas iti paggaak ken panagayat.
Sika ti lag-an kadagiti dagensen
Ti payak kadagiti babantot
Iti agsapa dagiti maladaw a gasat.
Iti isemmo nga isubli ti pammakawan
Kas iti salakan ti kada sakmol
Iti gemgem dagiti agmalmalanga a bigat.
Inkanto agtalawataw iti sabali nga ili
Kas kadatao nga agbilbilang
Iti bulong ti kalendario tapno iti oras
A madanonan ket agsubli iti naggapuan
Iti daga dagiti kadkadua a pinanawan.
A ngem ta itedmi kenka ita ti basbas:
Sika ti tarumpingay, sika ti daton
Sika ti pakadagupan dagiti amin
A sagut iti inaldaw-aldaw a panagapon.
A Solver Agcaoili
Hon, HI, Feb. 2008
Sirmata
TI SIRMATA TI NAKEM CONFERENCES
A. Solver Agcaoili
University of Hawai`i & Nakem Conferences (International)
Kunada a mainaw ti amin iti idea, nga iti idea nga agruting dagiti sabali pay nga idea a mangdagdag kadatayo tapno manen ken manen ket sirigentayo dagiti padastayo, ti gimongtayo, ken ti universotayo babaen iti lente ti adal a makaisalakan ken makaited iti pannubbot kadagiti amin a babantot ken dagensentayo.
Kasta ti Nakem Conferences.
Nangrugi daytoy iti idea—ket iti idea met laeng a nagruting. Ket ti idea iti komitment iti dayta nga idea ti mangpaspasantak kadaytoy agdama a realidad ti Nakem Conferences a kas taripnong ken tignayantayo amin.
Iti pannakarambak ti sangasiglo a padas dagiti Ilokano ken aminen a taga-Amianan—ken ti lohikal nga extension daytoy, dagiti Filipino—iti Estado ti Hawai`i, dita a naimula ti idea maipapan iti Nakem Conferences.
Maysa laeng ti gapuna: ti pannakasebrar dayta a naisangsangayan unay a padas dagiti Ilokano ken taga-Amianan ket ti pannakaitan-ok metten daytoy a padas iti pakasaritaan.
Ngem iti dayta a panagselebrar ket ti panagpanunot, panaganalisar, ken panagkritikar met tapno iti kasta ket kankanayon a mapabaro ti balabala ken naguneg dagiti adal maipapan iti kina-Ilokano ken kinamakipagili iti deppaarna ti Amianan.
Ti produksion ti adal maipapan iti kinamakipagili iti Amianan ti adda iti pantok ti kastoy a panagtitimpuyog a nangrugi idi 2006 idiay Universidad ti Hawai`i ken nasunotan manen idi 2007 idiay Mariano Marcos State University ket ita a tawen, iti St. Mary’s University.
Awan ngarud gamden ti Nakem Conferences no di ti pannakapartuat kadagiti adal a maaramat amin a taga-Amianan tapno iti kasta ket maitandudo ti kananakem, kannawidan, kultura, ken pagsasaoda.
Daytoy a gakat ti agserbi a pagibasaran no kadagiti sumuno nga aldaw ket ti Nakem Conferences, babaen ti basbas dagiti nagduduma a komunidadtayo, ket agbalinto daytoy a kas maysa a narukbos a kayo a paglinongan—ken pagtaklinan—dagiti amin a makipagili iti gimong dagiti taga-Amianan.
Hon, HI
Mayo 12/08
A. Solver Agcaoili
University of Hawai`i & Nakem Conferences (International)
Kunada a mainaw ti amin iti idea, nga iti idea nga agruting dagiti sabali pay nga idea a mangdagdag kadatayo tapno manen ken manen ket sirigentayo dagiti padastayo, ti gimongtayo, ken ti universotayo babaen iti lente ti adal a makaisalakan ken makaited iti pannubbot kadagiti amin a babantot ken dagensentayo.
Kasta ti Nakem Conferences.
Nangrugi daytoy iti idea—ket iti idea met laeng a nagruting. Ket ti idea iti komitment iti dayta nga idea ti mangpaspasantak kadaytoy agdama a realidad ti Nakem Conferences a kas taripnong ken tignayantayo amin.
Iti pannakarambak ti sangasiglo a padas dagiti Ilokano ken aminen a taga-Amianan—ken ti lohikal nga extension daytoy, dagiti Filipino—iti Estado ti Hawai`i, dita a naimula ti idea maipapan iti Nakem Conferences.
Maysa laeng ti gapuna: ti pannakasebrar dayta a naisangsangayan unay a padas dagiti Ilokano ken taga-Amianan ket ti pannakaitan-ok metten daytoy a padas iti pakasaritaan.
Ngem iti dayta a panagselebrar ket ti panagpanunot, panaganalisar, ken panagkritikar met tapno iti kasta ket kankanayon a mapabaro ti balabala ken naguneg dagiti adal maipapan iti kina-Ilokano ken kinamakipagili iti deppaarna ti Amianan.
Ti produksion ti adal maipapan iti kinamakipagili iti Amianan ti adda iti pantok ti kastoy a panagtitimpuyog a nangrugi idi 2006 idiay Universidad ti Hawai`i ken nasunotan manen idi 2007 idiay Mariano Marcos State University ket ita a tawen, iti St. Mary’s University.
Awan ngarud gamden ti Nakem Conferences no di ti pannakapartuat kadagiti adal a maaramat amin a taga-Amianan tapno iti kasta ket maitandudo ti kananakem, kannawidan, kultura, ken pagsasaoda.
Daytoy a gakat ti agserbi a pagibasaran no kadagiti sumuno nga aldaw ket ti Nakem Conferences, babaen ti basbas dagiti nagduduma a komunidadtayo, ket agbalinto daytoy a kas maysa a narukbos a kayo a paglinongan—ken pagtaklinan—dagiti amin a makipagili iti gimong dagiti taga-Amianan.
Hon, HI
Mayo 12/08
Subscribe to:
Posts (Atom)