ket ti kinaagnanayon
dagiti kanito. Matdakami
a makikinnikkiki iti makikamalala
a rikna no kasta a dagiti dalluyon
aganangsabda a kumamang
iti barukong ti maar-arakattot
nga aplaya. Dua ti muhom
ti pusomi ditoy: ti bantay
nga agikut iti palimed
dagiti manglimlimo a sabong
ti baybay nga agtalimeng
iti makabiag a sabidong.
Kastoy dagiti oras kadagiti isla
ditoy: agpayakda a mangidurigsi
kadagiti temporario a karayo
nga itaray-buagit ti tarukoy
kadagiti darat ti panawen
sadiayna nga ikuyukoy
tapno iti ipapasag ti pul-oy
ket dagiti kampay-idi ni rag-o
a diman masakruy.
Ania a gasat ania a panagraira
dagiti ganggandiong a bigat
nga iti pantok ti pagwanawanan
kadagiti gubgubat iti barukong
ket ti agtayandok a talinaay
nga iti lakkong ti dakulap
a maidasay.
Ti oras kadagiti isla
ket ti agnanayon a panagarrap
dagiti sabong nga iti rurog
dagiti darepdep sadiay
nga iti agsisipungtuan
a ladawan ni gasat mapasag.
A Solver Agcaoili
Hon, HI/2/26/09
