Hawaii Aloha (in Ilokano Translation)

Hawaii Aloha

Trans. by Aurelio Solver Agcaoili for IP 499: Philippine Cultural Mapping, Spring 2012

Verso 1:
O Hawaii, nakayanakan
Pagtaengan
Agragsakak bendision ti langit
O Hawaii, aloha

Koro:
Naragsak ubbing Hawaii
Agrag-o! Agrag-o!
Pul-oy umapiras
Pammateg ‘ti Hawaii.

Honolu/
Enero 24, 2012

Napadso a Panawen

Ti   panawen a napadso.

Makaited patay.

 

Daga daytoy nga aginana

iti kaunggan ti rabii

aguray kas iti kabaelan

a panaguray iti laksid a

ti kada lalaki

ti kada babai

ti kada ubing

agtagainep iti mangsingsinga a turog

iti panangpabassisaw iti boksit

iti danum ti kaadalman

a kari ti ubbog

a nabayagen a nagtalakias

a ti law-ang ket nabayagen

a naparkagan gapu iti pudot ti igaaw

nga isangpet napadso a panawen.

 

Nadagensen ti rabii:

adda ti babantotna kadagiti abaga

dagiti mangmangged

im-ima dagitoy ket inaldaw a maisalda

iti kada aldaw ti sennaay.

 

Ania a panangged ania nga ayat

ania a wayawaya ti adda kadatayo

Iti panaggaani a di met

makaam-ammo kadatayo

iti panaggaani a di met

datayo ti agtagikua?

 

Ania a kalintegan

ania a pagrebbengan

ania a pannaripato

ti adda iti lubong nga inaramid

a kakaasi iti kabaelan

a panangaramid a kakaasi

a ti darang ket ti apuy

a mangsilmot iti unget

a mangibati iti ania man

nga ited ti kararag

iti ania man a maaramidan

ken saan ti salakan

tapno pagbalinenna

nga arak dagiti ling-et

dagiti mangmangged

daytoy a pannakasapul

daytoy a kasapulan-unay

daytoy a panaggagawat

tapno agtutungtong iti kinalabon? 

A Solver Agcaoili

Hon, HI/Feb 15/09