Asul Dagiti Bulan

Asul dagiti bulan iti Enero
dagiti karurungsotan a tigtigre
a kadatayo makipagindeg
makikammayet a makikammaysa
agtagiuray kakaimbagan a gasat
sukal tratrahedia tawtawen
a nagtawataw palpaladtayo.

Kadua dagitoy nagal-alusan
a rikrikna wenno naglagisi nga alimpatok
tapno kadagiti ar-arapaap
iti law-ang nga asul, sa kolor-dapo
sa maris-dara, ditoy a maiparsua
agabuyo a kaunnaan a pammakada
tapno mangrugi a maikapaammo
paripirip agpenpenitensia
nga ayat ti piman a kamalala.

Asul dagiti bulan iti Enero
iti agsusukot a balikas
dagiti agpagungga a demonio.

Iti bukot ti panawen, ditoy
ditoy nga agdisso ti eklipse
ti umap-apuy a panagpalalo
tapno kadagiti maris ti asul
a bulan ket ti sumuko nga estranghero
kadagiti pantalan ni papauyo:
adu a malas a masukal
adu a panagpaputok iti luses
rebentador bawang trianggulo
plapla superlolo tapno agkuitis
dagiti ansisit a kadagiti suli
mabugiaw iti ringgor ti Enero.

Kas iti ili a pagilian dagiti ibit:
dagiti barko a lungon
nga iti agpakanito ket
ti pannakatay iti apagbiit
tapno kadagiti narungsot a danum
iti nakataltalna nga allon
ket ti waragawag ti pangulo
a no agsao ket agpuerong.

Agbiroktayo iti pangontra
sukal gitgita kadagitoy a malas
kadagiti siglo tapno ti buenas
a suerte ket kadagiti komedor
nga iti agnanayon ket aglabon.

A Solver Agcaoili
Marikina/Enero 1, 2009