SUDI NI ADAL WENNO RAYRAY NI PIRAK
(Bukanegan nga iparang ti TMI Global, Marso 18, 2011, Empress Restaurant, iti okasion ti “Sudi ni Laing” Scholarship Fundraiser, TMI Global, Honolulu, HI, iti panagakem da Natividad Cacho, Perlita Sadorra, ken Letty Manuel)
Sinurat ni Aurelio Solver Agcaoili
MANGIBABAET
Naimbag a rabii kadakayo a sangaili
Itoy a tallaong ket saritaan a pasalsali
Agdinniskutir dua ta dua a dayag
Agpinnasig nga agsinniglat iti galad.
SUDI NI LAING
Siak ni Sudi ni Laing, ti mamati iti kababalin
Mangipapati nga iti udina ket sudi ni laing
Daytoy ta daytoy laing ti mabalin a taklin
Gameng ti asinno man tapno iti biag agbalin.
RAYRAY NI PIRAK
Siak ti rayray ni pirak, siak ti agipalnaad
Siak ti mangipapilit a ti importante pirak
Doliar nga umat-atipukpok, kas makunak
Ta daytoy laeng ti mabalin nga irakurak.
MANGIBABAET
Ngarud nangngegantay ita, kakabsat
Naammuantay disposision ken ayat
Toy maysa a babai ket ti sudi ni laing
Ti met sabali a babai ket pirak di ibain.
SUDI NI LAING
Ngamin daytoy a Kulasa ket kastoy ti kunana:
Ti pirak kano latta ti pagrukodan iti biagna
No kano ta adut’ kuartana adut’ maaramidna
Ngem saanak a mamati iti kawaw nga ibagana.
RAYRAY NI PIRAK
Dinak met maallukoy daytoy a babai
A ti nasudi nga adal ti agtunda iti kari
Adu dagiti nakaadal dita ti kakaasi
Ada kadakuadat’ kaskasdi met a durgi!
SUDI NI LAING
Agtartarimaanka sika a Kulasa:
Dimo ipapilit a ti pirak adda gatadna
Awan ta amin daytoy ket mapukaw
No dumteng ti nairanta nga aldaw.
MANGIBABAET
No ti saritaan ket bennaten piman
Kuna ni Kulasa ti adal kapatgan
Kuna met ti sabali a Kulasa a saan
Ta ti rayray ti piraknat’ pamaangan.
SUDI NI ADAL
Pudno ti kunam sika a mangibabaet
Ta iti daytoy a biag adal ti langdet
Kaskenan iti amin uray no nagaed
Ta mapukaw pirak iti imat’ masaet
RAYRAY TI PIRAK
Saan a ti rason ti pannakapukaw
Ti pirak iti kakastoy nga aldaw
Ta umanayen ti kinabaknang
A pangpunno iti kalkalawakang.
SUDI NI ADAL
Ti adal ket iti bagi a naikapet
Ti adal ket iti panunot a dimket
Kasano koma nga iti babaet
Ket mapukaw ti nasalimetmet?
RAYRAY TI PIRAK
Kadaytoy a panawen ti adal magatang
Ngem ti kinabaknang saan ta saan
Kasano a gatangem ti gatad ti pirak
No ti pirak mismo ti ibirbirakat?
MANGIBABAET
Ti pagsasaritaan ket no ti adal mapukaw
Ti tungtongan ket no ti pirak agmawmaw
Kuna ti bangir a ti pirak ket sanikua
Nga iti kaano man ket matagtagikua.
Kuna met ti sabali a ti adal ti kaskenan
Ta dinto iti amin a panawen ket malibtawan
No ania ti makunayo dakayo iti tallaong
Ket iringpastayon daytoy nga iti ulo ket buong.
SUDI NI ADAL
Uray iti ania man a panawen ket ti adal adda
Saan a kas iti sanikua a no adda ket adda.
RAYRAY NI PIRAK
An-annuem ti adal no awanan rayray
Saan a kas iti pirak a ti sileng ti agsarday?
SUDI NI ADAL
An-annuem ti pirak a puro a rayray
Nga iti kawaw nga ulo ket ti sennaay?
Ta buong ti ulo ti adu unay a pirak
Ta bukbok ti kararuat’ naruay nga atik!
RAYRAY NI PIRAK
Saan nga amin nga adal ket makaanay
Saan amin nga ammo ket makaalalay!
SUDI NI ADAL
Saan nga amin a pirak ket agsileng
Adda pirak a tinagikukuan barengbaren!
MANGIBABAET
Umatiddog, kakabsat, ti saritaan a kastoy
Saan nga agugpot uray no dumteng pul-oy
Serraantayo ngaruden tapno jusgaan
No sadinno ti addan iti rason iti saritaan.
Ni Sudi ni Adal kadi ti innya sipatan
Wenno ni Rayray ni Pirak ti saluduan?
Agyamankami kadakayo, apo a tallaong
Iti awan labas a palakpak, gumgumluong!
