Darepdep iti Sabong a Palusi

Ket bumaringkuas ti mannaniw iti di pay nakariing nga alas-tres tapno ikur-itna ti maipapan iti daniw ti palusi a sabong tapno iti panagikur-it ket mataginayon ti sao, nga iti isip, sadiay laeng a maimtuod.


Agawem daytoy iti mamarparbangon a tagainep.

Ta ita ita daytoy nga agmurmuray a bigat
Ket daytoy a balikas manipud kadagiti naruay
A pampanunoten: palusi, ti sabong a puraw
Nga immuna a naranaan iti istoria ti inabraw.

No kasano daytoy nga immapay iti panunot
Ket di matunton dagiti rugi ti silaba
Dagiti adu a buttuon, iti man panagbirbirok
Iti kaipapanan wenno iti pannakabirok

Iti kaikarian. Tawen kas kadagiti makaltaangan
A rabii ti panagbirbirok iti sabong a puraw
Ket segun iti tagainep ita, daytoy a sabong,
Sangadosena a naimula iti sisesegga a bengkag

Ti nagannak ti gayyem ket iti turod ti mannalon,
Sadiay nga agsampaga, kas iti kayanga,
Wenno ti nabanglo a kampupot.

Kasariping ti palusi ti tao, kas ti daga
A nakaitukitan. Ditoy ti rugi ti amin
Maipapan kadagiti posible, uray
Iti bigat a mariing ti rikna a manglagda
Iti agellay a pasdek ti binangon a derrep.

Segun iti darepdep, iti kampay-idi
Dagiti mabalin nga isayangkat,
Agtitimpuyog dagiti apostol ti palusi
Kas ti disipulo ti amin a banglo

Dagiti mairanud iti seremonia ti angot,
Kas iti pintas kas iti salamangka
Ti palusi a sabong, ket iti ritual
Ti surnad ket iti tutok ti bantay daytoy

A maaramid ti inauna a libot.
Sabong kas iti sabong, daytoy a palusi
Ti napukaw idi a taraon!

Waipahu, HI
Noviembre 23, 2011

Istasion ti Panagsagaba, 1

After more than an hour, the fighters decided they could get the other four captives off. They were helped out of the front door. Gaddafi remained where he was, on his own at the back, silent and aloof. “The Capture of Gaddafi’s son,” NYT, Nov 20, 2011.


Kas idi damo, kasta met iti udi.
Ita ket martir ti sao, wenno traidor.
Kasano nga iyebkas dagiti tawid a basol
Iti dara dagiti kabusor nga idi ket adipen
Dagiti amin a kalbario a ti walang
A tagainep ti ama ti akimpatanor?
Pammagusto kadi ti ulimek
Tapno dagiti amin a makita ita,
Dagiti palagip iti panagsagaba
Nga iti ili ket impanamnama,
Patiray-ok kadi dagitoy iti babawi
Nga insao koma idi un-unana?
Iti isip ket ti napukaw a trono
A balitok a tinenneb dagiti saning-i
Ti mapadso a burayok. Kasano
Nga irugi ti sabali a pakasaritaan
Kadagiti disierto? Iti panagam-amangaw,
Nakitam kadagiti dagiti Ilokano
Nga iti kada kalio ket ti buteng
Ti kada tribu iti ilim tapno
Ti kintayeg ti selula ti kinaasinno
Ket ti panagkumbawa iti ama
Nga agnanayon nga amo?
Agtalappuagaw kadi dagiti bukod
A tagainep tapno iti pananglaga
Iti pagilian iti sabali a ladingit
Ket ti ikakaasi nga umuna
A panagsangit?


Hon, HI
Nov 20/11