Mapan daytoy iti adayo
Kadagiti ginget ti maulit-ulit
A panaglangan nga awanka met.
Addaka kadi kadagiti rabii
Nga addata kadagiti alingasaw
Ti aldaw, iti pantok ti bantay
Kas iti pantok ti nabara nga ayat
A nalimed a para kaniak
A nalimed a para kenka.
Mabalud ti dila, wen,
Ngem ania ngarud, dimo ammo
Ti palabra ti rugso kadagitoy
Nga ima a mail-iliw unay iti tengnged
Kas iti barukong, isuda nga agikut
Iti inanama nga iti sardam
Ket ti ladingitko birbirokennaka.
Addaak iti adayo, iti labes
Dagiti mangliwengliweng a taaw
Tapno ditoy makigubalak iti rigat
Kas iti daytoy a mail-ila a rikna
Nga iti managridridam nga oras
Ket kankanayon nga agrubrubbuat.
Subliak a kanayon ti ladawam
Iti kaawan dagiti ragsak kadagiti kalsada
Iti agmalem a panangaw-awagko kenka
A dagiti balikas ket inuumel a kararag.
Honolulu/HI
No comments:
Post a Comment