Pannakatay iti ugis ti anniniwan

Pannakatay iti ugis ti anniniwan


He came to power with brutality, and he ended his life in equal brutality. -- Victoria Cummock, a widow of a PanAm 103 flight passenger reportedly ordered bombed by Khaddafi in 1998, NBC Miami, October 20, 2011


Pannakatay iti ugis ti anniniwan,
Dayta ti imbatim kadakami a lagip.
Iti kadi kanal, wenno aripit
Wenno iti limdo dagiti pait,
Sadiay, kadagiti sulinek dagiti kuadrado
A buteng, sadiay kadi met nga indulin
Ti inauna a kintayeg tapno kadagiti pakaasi
Ket ti katik ti gatilio nga ukom ti rumbeng?
Mano kadagiti umili, iti lawag kas iti sipnget,
Ti nagkararag kadagiti sakaanan
Tapno iti buteg, lua, pannusa,
Saplit kas ti panagdawat iti maminsan
Pay a pammakawan ket ti linteg koma
Kadagiti imam nga itan ket kibkibkiban
Ti agarsab a tapok ken
Ti agsambuambo nga egges
Kas iti di mabilang a paidam?
Intedda kenka ti talek.
Impanmo ti namnamada kadagiti darepdep
Iti landok, semento, estatua,
Ayat iti agebbal a puso
Kas iti agmanas a kararua
Nga iti kadarrato, kadagiti manmano a pul-oy
Iti disierto, ket ti kaltaang dagiti ranggasmo.
Agapitka itan kadagiti immulam.
Kas kadagiti annak, nga iti ugis ti anniniwam
Ket ti ugis met laeng ti inwawam a salakan.
Leksion daytoy kadakami
Iti sabali a lubong, nupay iti pakasaritaan
Ket ammomi ti ugis ti kinamauyong,
Ti sukog ti anniwan dagiti patibong.

Okt 20, 2011
Honolulu