Budubudo iti Dakulap

Ita a Paskua ket daytoy ti pasamak:
Ti panagbudubudo ti dakulap.

Kas iti aginaldaw a Paskua dagiti pulitiko
Pulis, dagiti agpulpulpog iti aso

Ken bantay. Isu nga ita ket daytoy:
Ti layus a kasta unay a mangigibus

Iti anges ti amin a nabiag.
Saan nga umuna daytoy a pasamak

Iti Cagayan de Oro, ken saanto a
Maudi a rason ti dung-aw.

Versikulo a madagdagullit daytoy
Ta kanayon a nakaungap

Dagiti agbudubudo a dakulap
Dagiti agtagtagainep a pulitiko,

Agar-arapaap kadagiti barato
Pasuksok, pakimkim, aminen

A pangnochebuena, rabii man
Wenno aldaw, panaglamut a din

Sa ketdi agleppas iti sinam-it
No di ket iti adu pay nga am-amangaw.

Litania ketdi dagiti sainnek
Ngem saan a pulos ti babawi

Ta kasano nga agnakem dagiti anak-ti-diakes
No iti didigra ti danum ket addada

Kadagiti kastilio a fuerte
A kinabite dagiti adu a panagbudubudo

Ti dakulap iti bannawag ken agpatnag.

Hon, HI/ Dec 26, 2011