Siete Palabras Para iti Ili

SIETE PALABRAS PARA ITI ILI 

1. Pakawanem ida: dida ammo ti ar-aramidenda 

Agkintosda, dagiti a rinuker a dadaulo.
Kintosenda amin a makintos, kas ti pangngaldaw

Nga agal-aludoy a sumuko iti bannog
Wenno kinaawan namnama iti isu met laeng

Nga isu a kinaawan. Mangrabrabak ti ili,
Rabrabakenna amin a di makasaan

Dagiti awanan gaway a lumaban
Dagiti mangurkuranges nga iti television

Sadiayda nga agpamaang tapno ti arep-ep
Ket agbalin a senial ti di mangliwas

A panaglangan. Ipaiking iti pinggan ti amin
A tagainep iti panagbisin: Daytoy nga ili

Ket awanan iti utob-nakem, kas idi, iti sikat
Ti ilusion iti baro a gimong a ti pamwidan

Ket ti pannagna iti nalimbong, panagkanta
Iti panagdaydayaw iti lider nga ingget langgong!

2. Ita, kaduadakto iti paraiso

Narigat daytoy a kari, a diak koma ibaga.
Ngamin ta ar-aramaten ti simbaanyo dagitoy

A balikas tapno diyo sangalen ti balabala
Ti nainkalintegan a panagriri: ti diyo iyaalsa

No di ket agkanta laeng iti alleliua iti lauya
Numan pay ti dalikan ket mailiw iti beggang!

Kuduadakto iti paraiso ngem diyo tagtagiurayen
Ti masakbayan: urayenyo ti ita, daytoy nga

Agdama a buke ti salakan tapno kadagitoy
Nga injustisia ti kuskusto a panangabaruanan!

3. Adtoy ti anakmo: adtoy ti inam

Itedko dagiti ina a mangidalan.
Itedko dagiti anak nga iti dalan

Ket ti ingget' rikna a panagbirbirok
Naimpagilian a kaipapanan.

Ina: palaemem ti anak. Bay-am nga agtawataw.
Anak: ikkan ni inam iti sangaribu a panagdandanag

Tapno kadagiti rabii a ti saltek laeng ti agray-aw
Ket ti kansionna iti ili a di mangilawlaw-an!

4. Namarsua, Namarsua: apay a binaybay-annak?

Dumteng dagiti buteng, pangngadua, ngatangata
Ket ibitan daytoy a kapay-an, ket pabasolem

Amin a mapabasol, kas ti tanem a nakanganga
Ti nakarengngat a daga nga agur-uray iti bangkay.

Agibitak kenka nga agladingit nga agprotesta,
Ket ibuksilak amin a pannakigubal

Amin a dangadang manipud iti Mendiola
Agingga kadagiti amin a pananggulib ti ili

Kaniak tapno iti pannakapasag ket ti bagi
A din makabilang iti daradaa a sugat

Iti lasag kas iti daytoy a panangliput manen
Kadagiti saning-i nga ita laeng a managanak.

5. Mawawak

Mawawak, ngem dinak inikkan iti danum.
Inikkannak iti kari ti pannakapnek.

Ngem ita ket ti karabukob a naparkagan
Awan kadagitoy ti makaagas a balikas.

6. Ama: kadagita imam, isukok ti kararuak

Idatonko kenka daytoy a lasag ti tao,
Ti pagguddogan ti pakasaritaan ti kalvario

Sa ita ket ti maduddudog a puso.
Diakon masarkedan, diakon mabaelan

No di ket sangnguen daytoy umuna ken maudi
A pannakatay tapno ti daga ket makauray

Kadagiti itabon, sa itanem kadagiti sabong
Tapno iti tudo agrusing ti agnanayon a masanguanan.

7. Nalpasen, Nairingpasen, Nagwakasen, Naggibusen

Nalpasen.
Nairingpasen.
Nagwakasen.
Naggibusen.

Hon, HI/
Viernes Santo-Marso 29, 2013

No comments: