ASESINO, ASESINO

ASESINO TI TAGAINEP

Asesino ti tagainep, ania ti naganmo?
Ania a karatula ti ayan ti rupam a kabengbeng
Ti dapan dagiti mannalon a bengkag ket awan?

Sadinno a disso ti naggapuan dagiti patuchada
A kadagiti linabag ti karayo iti ili ket ti isem
Nga ingget garamugam? Mano a balikas, asesino

Ti tagainep. ti kaimudingan dagiti pader a pagipilkatan
Kadagiti litania ti amanga a kadagiti umili ket milagro
Ti narativo ti kinapimpiman? Agpannuray kenka

Dagiti bigat, kas ti kellep nga iti masungad nga aldaw
Ket mangbalabala iti massayag dagiti kaasi
A kada anaraar nga ipaidam. Umayka, asesino

Ti tagainep, kadagiti unget. Sadiay, kadagiti ulimek
Dagiti mangurkuranges, ket ti limdo a mapaksuyan
Santo agbalin daytoy a pammakawan iti gatilio

A mangiwanwan. Saan a revolusion ti sungbat
Dagitoy a gulib. Sipud pay, inkankansiondan dagitoy
Kadakami, pinamati a manipud kadagiti lenglengleng

Ket ti agpadara nga agmalem tapno iti apagapaman
Ket ti nabileg a maikuleng! Kanalbuong iti konsierto
Dagitoy a panagsantilmo, kunada, sada buraken

Amin a kappia kadagiti maiwawa a rabii.
Ngem ita, iti kastoy a madagdagullit a pannakatay,
Maimula ti bin-i ti nagabay a panagwayawaya.

Mayo 12, 2013/Hon, HI

1