REGATHERING-ILOKANO VERSION

PANAGGUUMMONG

 

(Sinurat para iti 2009 DWCL International Grand Reunion, Hawaiian Hilton Village, Honolulu, Hawai’i, May 2, 2009)

 

Umaytayo amin ita iti salonan ti kebbakebba

Lagip laeng ti pagpuonan kadagitoy a duadua

 

Nga iti daytoy a rabii ket ti pananggibus aripapa

Ngamin ta kastoy ti saritaan: ti mutia ket iti ima

 

Ikutantayo daytoy kas panangikut kakaisuna nga alipaga

Nga iti barukongtayo ket ti sagrado nga apuy ti kararua

 

Saantayo a nagpapaudi kadagiti panaglak-am

Kadagiti adu a pannakidaya kadagiti pagnakman.

 

Datayo dagiti in-inabot’ Divine Word College iti saririt

A koma iti nagkaadu a pakasaritaan maipagtangtangsit

 

Ket ita daytoy ti aldaw ti panagtagiben manen

Panagsubli kadagiti amin a ladawan a nasken

 

Kas iti sirmata dagiti nasantuan nga aldaw

Nga iti likmot ti pagadalan ket di aglagaw

 

Tapno iti paripirip dagiti malem ket ti narayray a silaw

A kadagiti sulinek dagiti siled ket ti din pannakawaw

 

A kadagiti barukong ket adda kas tagainep

A kadagiti agragut a rikna ket ti darepdep

 

Nga iti udina ket ti naayat a panangipannakkel

Ti Divine Word College, pagadalan a basingkawel

 

Kadagiti magapuanan dagiti adalan a minuli

Kadagiti duduogan a tulagan para iti puli

 

Ta ti Divine Word, kadagiti pasiliona iti agnanayon

Ket ti awanan patingga a sursurona, agkankannayon

 

Ti awan patinggana a panagarapaap iti sursuro

A kadagiti bangkag ti puso ket ditoy nga agpullo

 

Ket ita, iti daytoy a panagguummong iti adayo

Ket ti ladawan iti barukong ti pagadalan nga inatayo

 

 

 

Iti saklotna ket dagiti amin nga imbagtayo

Nga iti labes dagiti oras ket ti panagkurno

 

Sagrapentayo ngarud ita ti basbas ti taripnong

Datayo nga iti pagadalan nga ina nagsalinong

 

Tapno kadagiti tiempo ti naunday a ngatangata

Ken ti pannakapatalged kadagiti adu a duadua

 

Manot’ naibati a kaasi, imbatit’ di nanglipat nga ili?

Mano met dagiti aniwaas ti kinaasinno ti naisubli?

 

Ti adda ita kadagiti maibinggas agguumong a balikas

Nga iti pananglaglagip ket napalabasen ti ranggas

 

Datayo amin ti kasilpo dagitoy: datayo ken aminen

Iti daytoy a taripnong dagiti amin a langenlangen

 

Datayo nga immadayo iti pagadalan tapno agsubli

Agapon kas iti init iti malem iti saklot natalimeng a rabii

 

Mano, mano kadatayo dagiti agsublit’ atiddog a lagip

A kadagiti sinilong ti pagadalan a dati ti agparipirip

 

Ket sadiay ti kasin-awan pay laeng a danum ti bubon

Nga iti bigat ket ti agur-uray a makaep-ep a daton?

 

Kastat’ Divine Word: sadiaytayo a nagsakdot’ adal

Sadiaytayo a kadagiti agdan daytoy ket nagpangal

 

Maysa iti kada addang, dua iti kada ubing a kibaltang

Ngem ta ti Divine Word College ti rugit’ panagimatang

 

Nga iti awanan ressat dagiti araraw a nabiag

Ket irurukma dagiti amin a sanaang iti kalasag

 

Iti panagguummongtayo a kas adalan a manglaglagip

Ket ti panangsaluad ti panagipateg ti sursuro iti isip

 

 

Aurelio Solver Agcaoili, PhD

University of Hawaii at Manoa, Honolulu, HI