Panagalana ti Rikna iti Adayo

Dimo magawidan ti maab-abbed a rikna.

Kuna ti mannaniw a dina masbaalan
Amin a dagensen, kas ti awit ti busel
Iti pannakisinnanggolna iti angin ti bagiw.

Ngem ita, ditoy adayo, bilangem
Amin nga addang a mapan iti barukong,
Dagiti agkamang kadagiti purgatorio
Nga adda iti nagukraden a sabong,
Ita nga aldaw, ita a darikmat
Ti umad-adanin a panagrururos.

Mariknam dagiti kanito ti kinaestranghero
Kadagiti linia iti agledleddaang nga eropuerto.

Sika iti pilapila dagiti turista:
Babelda dagiti sao, kas balikas
Ti al-alidukdoken a rusok,
Sika iti nagtallikud nga anak ti daga,
Isuda nga umay tapno lumidok
Iti arak ti lang-ay a di met wayawaya.

Isuda iti kaatiddogan a pila:
Dagitoy dagiti kailian idi.

Isuda dagiti agaw-awid a rikna
Mapan agapon, umay umapon
Kadagiti templo ti nakem a bumakasion
Iti mamimbiit tapno iti bulbuloden
A tiempo ket ti panagriing
Iti parbangon a mangikasaba
A rumbeng laeng ti panagtalappuagaw
Kadagiti disierto tapno sadiay
Iti kapanagan dagiti babantot
Ket ti panagbirok iti singin ti sagot.


Ngem sika, iti katengngaan dagiti balikas,
Kukuam ti agalana nga iliw nga iti maleta
Ket sadiay nga imbaul
Tapno kadagiti tatak ti pasaporte
Ket dida masursuro ti gumarut.


Hon, HI
Agosto 26, 2011

Ti Umuna a Tudo iti Mayo iti Marikina

(Mayo 27, 2010)

Dimtengka kadagiti nabara nga oras
Iti maar-arakattot a sardam, sa iti agnerbios
A bannawag iti ili a nagkamangan,
Adayo kadagiti amin a dangadang
Iti lagip a naggapuan, kas iti panagtalappuagaw
Ti nakisang itan a danum ti Padsan.
Adu a pakasaritaan: ti daniwmo iti presidente
Nga iti panagtabon ti kararuana ket piman
Ta maitantantan kadagiti arimukamok,
Kadagiti bisibis ti tudo nga iti angrag
Ti tiempo ket ti maidagel a panagkulay-ong.
Kadagiti talon a masaripatpatan dagitoy
Kalpasan ti panagpadara ti nakem
Iti madagdagullit a kompesar ti kalgaw
Iti agur-uray a kanalbuong ti gurruod
Wenno ti anak-ti-sal-it, agkimat tapno
Iti apagapaman ket ti daga nga iti agmatuon
Ket ti pammadso ti nabaybay-an a gimong.
Saan nga ili ti adda kadatayo ita.
Saan a pagilian nga iti kansion ket ditoy
A maarikap ti sonata ti linteg nga iti sirmata
Ket adda kadagiti maidasar nga un-unnoy
Ti konsierto dagiti dadaulo nga agmauyong.
Liriko amin dagitoy ti gasat a ditay inay-ayat.
Liriko dagiti dayyeng nga iti agsapa
Ket ti pait dagiti bigat nga iti komedor
Ket ditoy a mabalasa ti numero a naimbag.
Kas iti loteria dagiti tagainep, kas iti pinnusoy
Tapno kadagiti papaayat ti ginnasanggasat
Ket ti agtagitao koma a ragragsak.
Ita ket ti umuna a tudo iti arununos ti kalgaw
A panagawid ti mannaniw manipud
Panagtalawataw kadagiti antigo a sursurat.
Inkur-it dagitoy kadagiti pakasaritaan
Nga iti kannag a bulan ket ti isasangbay
Ti umuna unay a pammakawan.

Itapaya ti mannaniw ti nakaungap a dakulap
Tapno iti appupo ti mangted bang-ar a danum
Ket ti kari a di pananglipat
Kas iti panaglaing iti tian iti sarsaraaw
Ti adu a pananglanglangan.

Surat iti Ili

Agbirbirokkami, O Ili iti karayo
A nasudi. Sukat daytoy ti tarumpingay
Ti iyaadayo kas ita, nga iti sapasap
Dagiti saomi ket ti nabiag a ragsak
Kadagiti duadua, nga ita, iti versikulo
Dagiti sirmata ket ti panagdadanggaymi
Tapno iti naganmo ket awagandaka.

Iti duogan a panawen: ti payapay ti aklo
Wenno ti panangmalmalo iti pungan
Sa ti pagan-anay, tapno iti ugaw
Ti maidasar a taraon ket ti lagip kenka
Wenno ti lagipmo nga agsubli iti sibay
Wenno iti pannakarikna iti babantot
Iti bagi kas pannusa iti kaawan
Iti iyaadayo kas iti ipapanaw
Tapno iti pantok dagiti turod ti rabii
Ni kaskadi nga ila ket ti panagam-amangaw
Nga agbirok iti desdes a pagkamangan.

Naliday dagiti aldawmi ditoy, O Ili,
Iti karayo a nasudi. Kadagiti panagbannawag
A mangriing kadakami tapno dagiti oras
Kamatenmi kas iti panangkamkamat
Kadagiti dalan, dayaw, dandanag,
Adu, adu a pakapilawan ti adda kadakami
Ket ti kaasim kadakami, dayta, dayta
Ita ti dawdawatenmi. Pinanawandaka
Tapno iti umuna a gandat ket ti dimin
Panagsubli iti arpad, tapno iti lakasa
Dagiti maipenpen a lagip ket ti agnanayon
A panangal-alaw iti kararua, iti isip kas iti panunot,
Panagduadua kadagitoy a mapaksuyan a bagi
A sumurot kadagiti pegges ti panawen
Nga itan ket mangpampanaw met kadakami.

Agrakayat’ balabala dagiti tagtagainep
Kas panagrakaya dagiti selula ti tured
A kunami idi ket dinto mangliput kadakami.

Sabali ngamin ti pagsasao ti agkabannuag
A widawid wenno ling-ay a ditoy baro a disso
Ket intugotmi, nagpuonanmi, kas iti bara
Nga adda iti lukong ti dakulap nga iti agnanayon
A pannakapaay ket umay a mangar-aria kadakami.

Adukami a pimmanaw, riwriw a liday
Kas makitam, ket iti daytoy a tallaong
Ket ti suma ti amin a panangay-aymi
Iti gasat, naimbag a gundaway, ngem gasat
Met kadagiti paspasarak iti isem iti sardam
Wenno iti karkarna nga inana iti bannog a kasinginmi.

Agawidkami kadagiti darepdep tapno iti parbangon
Dagiti balikas nga iduldulinmi a kas kari
Ket ti ladawam, sika O Ili, ti imahe
dagiti agpagungga a panangngaasi.

Ta addakami ditoy, iti walangwalang,
A kaskasdi a mangliwliwat iti ritual
Ti panagsubli, kas iti atang nga iti dios a lung-aw
Ket iti apagkirem maibabawi tapno awaganmi
Dagiti bulding, dagiti pilay, dagiti artek,
Dagiti aminen a kagura kas pananggurgura
Iti bukod a bagi a pangikkat buribor ti ulomi.

Agbirbirokka, O Ili, iti bannuar, agbirbirokkami
Met iti ili nga addaan iti mannubbot, daytoy
Baniaga a profeta nga iti barukong ket sadiay
Nga agindeg iti napaut tapno dinto agparang
Iti sabali, tapno sadiay, kadagiti sulinek
Ti talged nga adda iti maila a pusomi,
Ket ti panagbantay ti sirmatami
Tapno, kas ita, iti daytoy a ngayed
Ti panagmaymaysa ket ti punganay
Ti milagro dagiti sardam
Ti panagtao ti batumbalani a para kadakami:
Babato daytoy kadagiti amin a maisupadi
A balikas tapno iti urnos dagiti kapitulo ni padas
Maipasngay ti bannuar ti agkatangkatang a lasag.

Ditoy, iti estranghero a daga,
Ditoykami nga agsurnad, sumuknal iti espiritu
Ti mangisalakan a panagwaywayas.

Recited, INCAT Alum Assoc Banquet, Pacific Beach Hotel, Honolulu, May 1, 2010

Daton/Offering

DATON

Ken Prof. Lindy Aquino, iti panagretirona

Masangal dagiti tagainep ti puli: addaka.
Kadagitoy a dana a waknitan ti agsapa,
Sika, buyog ken kibinmi kadagiti duadua,
Sika ti daton nga iti ridaw ti aldaw ket ita.

Agsaksikami kadagiti amin nga aramid
Nga iti entablado ti pakasaritaan a limed
Sikat’ silaw a nalawag nga iti panagkedked
Ket iti tanap ti buteng sika ti sarikedked.

Dimo itulok dagitoy a tulag iti karsel.
Siaammokami a kadagiti rabii ti pagel
Ket ti sirmatam nga iti rungsot ti dawel:
Ti mangruk-at a damag dagiti makabael.

Sika dayta, ken dagiti sabsabali pay
Nga iti likkaong dagiti dalan ni ay-ay
Ket ti daton nga iti bannawag narayray:
Kinalinteg addat’ beggang ni tarigagay.

Regget kas essem kas nasungdo nga ayat
Sika dayta a dadaulo nga iti panagiwayat
Sipnget kas iti adalem ti rabii ti pinnaksiat
Addaka kadagiti aramid a salakan linnib-at.

Dagitoy amin ti ibati iti inka panangigibus
Panagserbi kadakam awanan parparaipus
Ket iti baet pangngaduami iti gasat ti kadus
Daytayto lagip ti karitmo di itulok a maibus.

Ngarud, ita ket kenka inkam amin sumuknal,
Sika a maestra ti puli, ejemplot’ adu nga adal,
Dagitoy a balikas ita kenka inkam agsangal
Pammigbig nga awan ressat pantok ti pangal.

Aglabeskam nga agpullo maubon a datonmo
Iti inal-allangon a puli, panangaklon ‘ti pudno
Nga itan ket masakbayan ti ili sarsaritanakanto:
Iti tagainep nga iti udi tagikuaennakat’ tiempo.


AS Agcaoili, Abril 17, 2010, Ala Moana Hotel, Honolulu, HI

Kansion iti Kellep

Daytoy ti murdong dagiti amin a sarita
ni ayat. Ti bulan iti saklot ti aldaw.

Ti init iti saklot ti rabii iti saragisag
nga abungot ti sipnget
nga iti panaginnala ti angin
ken ti pantok ti turod
ket ti mainaw a tagainep.

Sika daytoy, iti adayo a linabag
a kadagiti apros ket ti leddaang
a manasanak.

Ket siak, mabatiak kadagiti kari
ti kalman nga iti kalsara dagiti ariangga
ti agproprotesta nga ili ket ti duayya
dagiti manglanglangan.

Agtakkub ti langit ket daga:
agalimpatok ti rikna plato ken ti ganggang
ket iti lukong dagitoy ket ti mabalabala
a pakasaritaan. Maabel ti sinulid
dagiti saning-i nga iti paniolito
ti mangrangranggas ket ti bandera
ti marangranggasan nga ili.

Galeria dagiti dios

Iti kalkalsada ket ti galeria dagiti dios
ita kas idi pungay dagitoy amin
a ladladingit ket ti republika
ti ngatangata nga ita ket katkatawa.

Kasta unay ti pamsaakanda
kadagiti tagainep, makautibo
kadagiti bessang, sa kadagiti avenida
nga armado kadagiti karatula
dagiti kari nga iti agsapa maumag.

Kastoy ti buya nga am-ammo
iti ili. Manipud kadagiti pagsikuan
ket ti benditado nga altar
a kaibatogan ti apagapaman.

Hon, HI

Agpamrit ti Angin

Agpamrit ti angin ditoy Manoa,
iti patag dagiti agngangabit a rikna
itatta a darikmat ti panagmaymaysa
dagiti pampanunot nga iti adayo
ket aglayag, kas panagem
kadagiti sabong nga iti agsapa
ket agukrad tapno sibbarut
ti allawig ti ayamuom, idaton
iti altar ti dios a mannabidong.

Iti tawa, kasta unay ti pamsaakan
ti agpamrit nga angin ti bakrang
ti bantay. Arrabisenna dagiti muyong
sana iwaneswes ti sagawisiw
dagiti billit a bulbullagaw.

Ita ket ti orasionmo: ti ballatek
nga iti panarapar ti rabii a maul-ulaw
ket ti maiwaneswes a lallay:
ay, adayo ta adayo ti ili a naggapuan
dagitoy amin a linas ti lagip
nga ita ket iti panaas daytoy
ket iti pus-ong nga agkiet!


Hon, HI

Sarsarming

Saan a sumrek ti maysa a tao kadagiti sarsarming, "Ti Daniw ti Mannaniw," Jean Cocteau


Agiballatek sarsarming kadagiti imahe
ti lawag nga iti rabaw ti soltero a lubong

ket ti daniw a maimansayag, aguray
kadagiti umras, ti uppat a pulo nga aldaw

a kararag simmina a gasat. Makapurar
ti nataengan nga init iti barukong

ti agkabannuag nga aldaw.
Iti kada apros ti biudo a lamiis

iti sellang ti rabii, sadiay ti agbiag
a ragsak, mangrugi kadagiti amin

a rugi ti panagbirok iti paniolito
tapno iti igid ti mata ket ti tumbog

a lua dagiti amin a parparato.
Appupuen kadagiti mawaw a dakulap

im-imahe dagiti sarsarming.
Iti panangibalud kadagiti ladawan

ket ti masansan a panaginsasaan
tapno maammuan ungto ti kapay-an

dagiti napusaksak a sabsabong
nga iti panagruruting ket agiyatang

ayamuom a naarkosan iti malaylay
a nagtagiruting a biag a masayang.

Anian a pannakaabbukay ti rikna
ti sagut ti busel nga iti agnanayon

ket ti pammateg nga agkukutel
no kasta a ti baro a sarming

ket ti agmaya nga ayat a ditoy
nga iti agnanayon agpasindayag.


Hon, HI

Parparmata

Yeah everybody wear da mask but how long will it last. From, "The Mask"


Agpapada amin dagitoy iti alintatao:
ti panaggangganat, kas pagarigan
dagiti rikna nga iti punganay dagiti babawi
ket ti narasi a katkatawa a para iti angin
sa kadagiti bulong iti pantok ti Bantay Bimmaboy
nga iti kapanagan dagiti sao a para kenka
ket ti sabangan dagiti maul-ulila a lailo
dagiti mamanso nga ima
tapno, kadagiti manglimlimo a puso
ket dagiti dalan nga agtunda iti walang
ayat nga awanan kaasi, kas iti waneswes
ti allawig nga agnagan iti rungsot
tapno kadagiti agpakpakada a lawag
iti makiin-innagaw a sipnget ket sika.

Daytoy ti akemmo kadagiti segundo
nga ikutmo ti apagapaman nga alinuno
ti rugso: sika ti puseg dagiti mababain
a kinatao tapno iti kagay ti sipnget
ket ti lamolamo a bagi a mangtagtagiiliw
kadagiti makusen a lino, pungan, urok
panagkamata dagiti perreng gapu ta sika.

Kastada: dagiti immadayo kadagiti asideg
a pangapatan ti panagdistierro
kadagiti amin a kinukusit a lagip
ti pannakipagili. Ditoy ti pammateg
a di agruting, kas iti kalgaw
a di agar-araraw iti arbis, arimukamok,
tudo, layus, bagio, ginggined:
aminen a mamagkintayeg iti bangkayen
a namnama tapno agsubli a di umaddang
iti lugar a pinanawan, din ipirpirit
saanen a bunga dagiti parparmata.

Hon, HI

Baybay ti biag

"Life is like the surf, so give yourself away like the sea." Luisa, in Y Tu Mama Tambien

Baybay ti biag.
Wenno kas kadagiti allon
a nagawit sansanaang ti universo.
Adu a lua manipud kadakami
iti bangir dagiti kapanagan
iti bangir ti plakda nga init
mabannog a mangin-inar
kadagiti kadaratan a mangitanem
batbatibat panagmaymaysa
a panagbirbirok panawen a bukod
tapno kadagiti rupa ti langit
sadiay, sadiay a maani dagiti paulo
ti daniw a mangiladawan
ti panagidaton iti bagi.

Adayo koma nga amang
ti panagtalanggutang
ngem kas kadagiti dalluyon
kadagiti didigra ti law-ang
masapul ta masapul
ti panagallaalla uray dagiti linabag
ti masakbayan nga ita
ket putputaren dagiti atang
iti altar ti exilo a nagan.

Ket kas iti managpabus-oy
nga allon iti ngiwat ti Paraiso
ditoyka a sumrek iti baro a biag
manipud iti punto ti panaglayag
tapno umadayo ken agpasag.

Hon, HI

Arimasamas, 2

Ita ti maikadua nga aldaw
ti panagpasikal ti mabugi
a namnama. Agriingka
iti idda a pinaturog ti rabii
ket iti agsapa dagiti pul-oy
iti Waipahu ket ti sumingsingising
nga init iti Diamond Head
iti nawaya nga aplaya dagiti ragsak
nga iti naminsan
pinaay dagiti saosao
maipapan iti higante a dalluyon
wenno allon manipud iti baybay
ni buteng kadagiti aldaw
a di masinunuo ti nakem.

Adda dagiti damag
iti panagpapatay iti ili,
kadagiti umili kas kadagiti ubing
a darepdepda, maikali dagitoy
kadagiti narabaw nga abut
ti madagdag nga amak
amangan ta kadagiti sanaltek
ket ti panagbebessag:
mariput ti danag
kadagiti sangi kas iti agbebessag
a bibig ken ti agattaet a balikas.

Lagipen ti ili kadagiti amin
a pananglipat: kriminal, kriminal,
husga ti timek kadagiti suli
ti tanem ti naitabon nga isem.

Hon, HI

Arimasamas, 1

Ditoy adayo, ditoy a sumingising ti init
Kadagiti agkettang a bantay,
Agur-uray iti marsaak a buteng

A kadagiti ul-ulila a baybay ket ditoy
A nagkamang tapno kadagiti baniaga a dalluyon,
Ditoyta kadagiti pantok a mangandingay

Berde a danum a darangen ti asul
A langit nga iti apagapaman
Ket sakruyen ti lawag ti mababain

A bigat, ita a ti tsunami ket agayab
Kadagiti kararua dagiti tarukoy
Ken dagiti dalumpinas a bato

Nga iti irut ti sipnget iti agmurmuray a daya
Ket ti bannawag nga ipasngay ti agsiuman
A katawa: Ita ti aldaw ti ginggined, makaaripapa

A padas ti panagkayetket tapno iti linabag
Ti baro a panagkiet ket ti rusok a di metten
Makaanges, di makasariwawek.

Manglaglagip latta datao nga immadayo
Kadagiti kakastoy a ladawan a parparato
Iti ili a pinanawan. Kadagiti lakasa

Ti lagip ket ti mabibbibi a puso
Nga iti damag ti didigra agpaspasanaang.
Kas iti kaniak, iti konsierto dagiti sirena

Nga iti agdudungsa nga aldaw
Ket ti pul-oy a kadagiti kabakiran
Ket di man laeng agkiray.

Kasano ngata dagiti narungsot nga allon
Iti sabali nga ili, kadagiti agbilbilang
Iti pimmusay, kas iti naggapuan

Nga agikali uray kadagiti agpakpakaasi
Nga allilaw a ti lasag daytoy
Ket ti marirriro a tarumpingay?

De-rosas ti maris ti ubing nga agsapa
Iti mangwakwaknit a parbangon
Ti sagrado a salakan a managsaksakbay.

Hon, HI

Devastador Terremoto

Ocho punto ocho, numero ti pammadso
iti Valparaiso. Concepcion. Santiago.

Ita ti agsapa ti devastador terremoto
oras a lukagennatayo ti danag nga agkaribuso.

Agiriag ti kabsat: gasolina, inna kunaen.
Kargaam, kaka, kargaam ti auto

ta umayen manghusga a delubio
agsanglad daytoy kadagiti ganggannaet a puso

nga iti ili a naggapuan ket umad-adayo.
Kastoy ti didigra, ti ginggined kas iti dalluyon

nga iti sabangan ket ti ipaanud a dagensen
ti sennaay kadagiti danum nga iti apres

ket ditoy a ruk-atan, piman nga ibulos
tapno iti rekkang dagiti daga iti barangabang

a lansad ti garangugong ket ti mangrikna
a buteng ti agmamayo a sansanuong.

Murmurayennatayo dagiti kakastoy
a damag, iti Chile kas iti agkapuy

a gasat: mabiag ti mabiag, agbati
ti nasikap iti sardam a batibat.

Ocho punto otcho ti numero ti didigra
nga iti Santiago ket ti malmalanga.

Mabatikami ditoy Hawaii, kaduami
ti danag nga iti arnerbios a sirena

ti kapitolio ket ti ladawan ti amak
dakami nga iti rupa ti law-ang

ket agguardia kadagiti umay a darikmat
tapno iti sagrado a segundo ket iruruk-at

kadagitoy a ritual ti antigo a trahedia
nga iti lohika ti biag ket awanan ressat.


Hon, HI

Ti Raman ti Kamotig

“Even children who are fed only camote are dragged into intrigues. They’re pitiful. And it’s not said anywhere that eating camote during a campaign is prohibited,” Manuel Villar said. Inquirer, Feb 28, 2010.

Veinte pesos, kunam, sika a presidente
ti ili a kadagiti agpang ti tig-ab
ken panagsaraaw ket ti rurusoken
a rikna ti agam-amangaw nga ubing.
Mapasubli siguro kenka dagiti buya
ti panagubing iti Tondo ken
kadagiti aminen a kaliehon
a ti bisin ken maysa nga agmauyong
agpuerong kas iti aso nga addaan
iti sabidong tapno iti katayna
nga iti ili ket maigamer iti taraon
ket iti idda a pakatayan a sadiay
a ti maiwawwawa a kararua nga agapon.

Maysaak koma kadagiti ubbing
a nakaawat iti pangep-ep
iti panagpanaas ti boksit
nga iti agpatnag a panagdawat
iti limos ket ti musiig ti ili
kaniak a mangtagtagibassit.
Apay kano nga inanaknak ti inak
wenno imputotnak ti amak
iti romansa ti ayan-ayat
no iti walwalang met laeng
ti pangalawak mapukpukaw
a bukod nga arapaap.

Wenno daytay rupanget dagiti nagdalungdong
nga iti simbaan ket awit-awitda pay laeng
ti rosario ti indulhensiat' orasion
nga iti maulit-ulit a panangawag
iti buoten a patron ket ti isemna
nga iti langit sadiayda nga aglayon
idinto a siak, amlidan ken agpapaarayat,
siak nga iti aldaw-rabii ket kanayon
a ti kaasi ti Namarsua agdawdawat
siak a ditoy, kadagiti buya ti kamotig
a tinudok, siak a di man laeng
makadilpat uray laeng iti tagapulot
ket ita, iti paraburmo a presidente,
malanitan ti karabukob.

Diak ammo ti maipapan iti politika
a kunkunada ket lamlamiong.
Agkiraud ti boksit ket dayta
ita ti ammok a rason ti panagpasugnod
iti ili kas kadagiti managimbubukod
a mangibaga a siak a mabisin
diak mairaman iti bilang ti mairanud.

Hon, HI

Oratio Imperata para iti tudo

Manila Archbishop Gaudencio Cardinal Rosales has asked the Catholic faithful to “storm the heavens” with prayers for rain. Inquirer, Feb 27, 2010.


Daytoy a tikag ti mansotayo amin.
Ballatek kadagiti amin a panagbaybay-a

Iti di panagsurnad templo ti lubong
Nga iti bisin, gawat, panaglablabes

Ket dagiti maudatal a malmalanga.
Ta ania ngarud ita ti kuna ti rikki

Ti agladladingit a daga, ti rekkang
Dagiti amin a kari nga iti arbis

Ket ti nadam-eg a kinelleng
Ti maibunubon koma a rikna

Ti maani a pagay, ti maipenpen
A mais, sa dagiti ikan nga iti milagro

Ti de-rosas nga agsapa ket ti padaya,
Datayo amin, iti pabunar angtaben

A lagip ti labon tapno iti panagilad
Ket mapnek a duri, di agkiraos a sirmata?

Isu a ti tudo, daytoy ti ikararagtayo ita,
Kuna ti obispo dagiti amin a parintumeng

Sa ti panamati iti patron ti alingasaw
Nga iti agngangabit a danum ket pumanaw.


Hon, HI


A

Awan balo a sao

Awan balo a sao kenka.
Saan a kenka ti ulimek
ta dagiti balikas
mannamayda a mangted
ulaw talimudaw mamayo
tapno kadagiti bangbangir
nga isem ti demonio
ket sika: mannaniwka

kadagiti amin a panagkatangkatang
kadagiti asul nga ulep
kas iti kimat ti dusa nga apagapaman
ket iti aganak ti sal-it a sennaay
ket ti agrubrubbuat itan
a rikna ti mapaay.

Awan a balo a sao kenka.

Sika dagiti amin a tabbaaw
dagiti raprapin dagiti utek
nga iti ginget ti lagip
ket ti agmurir a ladladingit.

Hon, HI

Batibat

ERAP HAS TAPPED THE LOWLY tricycle to power him back to Malacañang. C. Esguerra, Inquirer, 22 Feb 2010

Kastoy ti rupa ti batibat:
ti panagsubli iti poder
iti ilusion dagiti darikmat.

Naminsanen nga inabalbalaymo
ti gasat kadagiti palad ti ili
sa ita, iti di mariendaan a nadakiwas

a rikna ket ti gagem a manen
iti palasio nga ideklara ti pammateg
iti masa. Nangngeganmi dayta

manipud iti saning-i dagiti galunggong
agingga iti estoria ni Mang Pandoy.
Sa ti bangka a papel dagiti ubbing

a kadagiti agkabannuag a tagainep
ket iti nabuyok a danum nga inrarem.
Kunam: ti trisiko ti pagluganam

tapno iti Malacanan ket sadiay nga itunda
ti baro a batibat a kadagiti bannuar
ket iaatang, idaton kas pannubbot

basol nga awanan pammakawan.
Panangkautibo iti takneng, kas pagarigan
ken ti panangisakibot namnamat' pagilian.

Ngem ita ket daytoy ti husga:
dikanto kaano man makasubli
iti aklili ti puli nga iti napalabas impatli.


Marikina, Filipinas

Morong 43

Makautibo ladladawan ili a naimbag.
Saankayo a numero iti parparmata.
Maibilangkayo kadagiti bartolina

Nga iti pakasaritaan ti ili a gumawgawawa
Ket ti ballatek iti putan ti paltog ti turay
Nga iti panagraut ket ti bileg ti bala.

Kasano nga inkay agsaan wenno agikurimed
Uray iti bassit-usit laeng a timek iti balikas
A mangammo ti kapay-an kadagiti rabii

Ken aldaw a didakayo mabirokan dagiti anghel
Nga iti rekisito ti langit ket iti karsel a nabugiaw?
Kuarentaitres, kas iti aliwit ti wayawaya

Nga iti dangadang ket ti mabati a kinapimpiman
Ti pannakaamiris nga iti baet dagiti tulagan
Ket ti palso a sao dagiti mangiyaw-awan.

Kasano itan, kasano ti pannakaited iti salun-at
Iti ili kas iti tagainep a mamagkaykaysa kadatayo
Amin, ti sirmata iti masakbayan ket ti katawa

Dagiti siudadano nga iti pagilian di kinandaduan?
Kas iti aramid solsoldado-ti-riro, kastoy ita
Ti babantot daytoy naunday a panagur-uray.

Amin dagitoy ket aramid a panagtambang
Tagtagainep nga iti dalan ket masukog
Mapnek iti ragsak nga agwaywayas

Kas nabara a darang init kalpasan nepnep
Nga iti agpigerger a danum babaen ti langit
Mangisagut bang-ar barukong ti kinelleng.

Kuarentaitres a dung-aw ti kaibatogan dagitoy
A madagdagullit a panangliput maidaton
A bannawag, maiyatang koma iti dagusan

Ti santifikado a sirmata nga ita ket ti ili a nagasat.
Ngem saan: adda nakalemmeng a kriminal
Iti putan ti paltog, adda biktima iti bartolino

Nga iti ulimek ket ti pannakabusal
Ti ngiwngiw ti nasalun-at a purok.
Morong 43: riingenyo ti ili nga agurok.


Filipinas/Feb 15, 2010

Nabangonan

Naibangonak ti panagkadkaduami ken Dr Belinda Aquino. Maysa a tagainep: magmagnakami a dua. Ket ita, agpasyo, pimmayso ti panangitundak kenkuana iti balayna, isuna nga agbibiag nga agmaymaysa.

Perlita Sadorra


Kasta dagiti paltiing.
Tagtagainepda nga umay
a kas paripirip

tapno iti ibabangon ket ti panagsaksi
dagiti barsada dagiti parparbangon
a riingen tartaraok.

Addan panagkapuy ti pannagna
ti profesora nga iti ili nagpaay
a kas tinapay kadagiti mabisin

ti darana iti kopita
dagiti amin a dagensen
iti tinapay a malisayan

pannakapnek a sarurongan
ti gawat kadagiti sagrado a lamisaan
tapno iti panagarapaap manen


ket ita, iti daytoy a panungpalan
tagtagainep ti labon,
panagangtab panaglak-am.


Hon, HI

Anghel a Tanso Para Kenka

Ken Manang Ruperta Asuncion


Kenka, Manang Perting:

Daytoy ti anghel a tanso para kenka.

Naggapu ditoy adayo nga ili
a nakaisadsadan, nagtalanggutangan
tapno kadagiti kadilian ket ti puris
a kadagiti dapan nagrigat ketdin
a mabukual uray no dagiti balikas,
natirad kas punial
ket iti anginda itan a maitugkik
tapno kadagiti agdara a langit
ket ti makaagas a garakgak.

Nagsalata idi, umuna ket itan,
iti ipupusay, daytoyen ti maudi.

Naikur-it kadi daytoy
kadagiti lagip nga iti ili ket ibati
tapno babaen kadagiti dokumento
ti pakaasi ket ti panangaklili
kadagiti amin a pakaitibkolan
ti ibabangon iti nakaitekleban
a no maminsan ket nakaisagsagmakan
dagiti daniw, arayat, panagipateg
tapno kadagiti sariwawek nga isip
ket ti kasta, nga iti bit-ang,
ket ti panagbirbirok iti kaipapanan?

Nagsalata idi, ket dagiti arimpadek
dagiti aggurigor a dapan, isu dagitoy
ti kumpas dagiti saem
sa ti katkatawa
sa ti panangitedmo kadatao
iti evanghelio ti namnama
nga iti udina, iti panagkanta
ti tanso nga anghel
a manipud ditoy adayo
ket panglagipko kenka,
iramannak, Manang Perting,
iti kaikariam nga inana,
siak ken dagiti sabali pay a mannurat
nga iti kallautang ket ti kararua
nga iti hustisia aggangganat.


Hon, HI