(Maidaton ken Cristina Guevarra, dadaulo iti protesta, adalan 'toy numo iti universidad)
Mangrugi ti protesta kas iti dati.
Oras daytoy dagiti milagro ti unget
A kadagiti sangi ket ibalunet.
Namak pay ta ipakita iti pulis
Ti gemgem a ti birngas daytoy
Ket ti agkabannuag a karit
A sipud pay idi, iti diktadoria
Dagiti lagip ket ti agrigodon
A panangat-attit.
Kadagiti saning-i
Nga iyaleng-aleng
Ti aribai, ditoy ti pamkuatan
Dagiti komplikado a rikna.
Lasag kontra iti batuta
Karbengak kontra iti puersa
Ket daytoy a rapukrapok
Iti dalan ti malmalangan
A ta kasano ti agbiag a pimpiman
No ti pangulo ket agpagunggan
Agbakuar santon met laeng mangan
Mangan santo met laeng agsaruan!
Ket iti restoran dagiti puraw
ti kastoy a buya nga iti imahinasion
Ni marigrigat ket adda laeng
Iti ping-ir ti aripapa. Kasano a magteng
Ni mabisinan dagiti pinggan a naglaon
Kadagiti taraon a di maisao
Ta ti paaweng daytoy ket iti agong
A sumuko tapno iti madanonan
A panaglalanglang ket ti ribo a doliar
Nga aggapu iti ling-et ti tao?
Mabati dagiti umili
Kadagiti sulsuli ni rigat.
Siglosiglo itan daytoy
A pakasaritaan ket awanan
Daytoy iti linas ti panaggibus.
Idinto a labon ti lak-amen
Dagiti agpagungga a dadaulo
Kisang ti pagraranudan
Dagiti din makaisubo
Uray koma laeng makabiag
A balikas nga iti latok
Ket maigao.
Kasano a lak-amen
Ti kari nga iti angin
Nga ipalladaw, agampayag
Daytoy iti dana ti protesta
Dagiti kontra iti am-amangaw.
Maipalek ti batuta
Iti ubing a lasag
Ket kadagiti urat a sumriag
Ti dara ni ayat iti umay a bigat.
Duapulo a daraan iti muging
Kas iti lagip, iti barukong
Kas iti pakasaritaan.
Ngem ita Mierkoles ti protesta
Ket ti agtultuloy a pakawayawayaan.
A S Agcaoili
Hon, HI/Aug 19/09
No comments:
Post a Comment