Ti Sangabilion a Balay ti Dios

MANILA, Philippines—Apart from his “real dream” of becoming president of the Philippines, El Shaddai founder Bro. Mike Velarde wants to leave his followers a cross-shaped church touted to be “the biggest place of worship and prayers in Asia.” N. C. Calleja, Inquirer, Aug. 19, 2009

Sangabilion a balay ti Dios

daytoy iti sangabilion met

a salaysay ti kinapanglaw, 

iti maysa nga ektaria

a pagimurumoran kadagiti bukel

ti kararag dagiti agur-uray

iti gasat, adu a gasat,

ken adu a kararag tapno

iti aldaw dagiti pannakatungpal

dagiti kari ket ti oras 

dagiti milagro a makeltay.

Kuna ti fundador a para 

iti Dios nga awanan bagi

a pagitukelan dagiti espiritu

ti ayat tapno agsantak daytoy

aglayag kadagiti ulep iti ngatuen

ti altar a balitok

agsirko nga agampayag

kadagiti pasamano, ridaw

tawa, suelo, datar a karuprupa

ti sileng ken ngayed

kinabaknang nga awan kadagiti pobre

a kararua dagiti pasdek a kas itoy

nga iti panawen ket sumuko

tapno iwaragawagna

a ti Dios nga imbalayan ti tagainep

ket awanan iti tumeng

nga agkutukot

boksit nga agbirok iti nilugaw

karabukob a maparkagan

agbirok iti basi a nakaro 

tapno agrambak kadagiti nabilligian

nga aldaw.

Sangabilion daytoy a balay

ti Dios nga awanan bagi,

di makasapul iti pagiladan

saan a kas iti karruba

iti sansaning-i.

A Solver Agcaoili

Hon, HI /Aug 19, 2009