Berdugo Dagiti Tagainep


Jovito, sika ti balabassit nga ari ti law-ang.
Iti igammo ket ti anak-ti-sal-it a mangpaksiat
Iti aliwaksay kadagiti isip nga agsasamusam

Tapno iti gunay ti gatilio ket ti umuna
Unay a pannakaidasay. Sa maikadua,
Sika a pagapuan ti poder kadagiti pakaasi

Ti bartolina ti di maaldawan a rabii.
Sadiay Fort Magsaysay nga ayuyang,
Sadiay ti rugi ti kablaaw ti babai kenka.

Kontra kadagiti amin a balikas ti wayawaya,
Kunana, ti babai a bassit a gigante
Iti amin a panagkusit dagiti nangisit

Nga ansisit, ti boneteda ket adda iti siitan
A barut, sa ti bitla a pananguy-uyot
Tapno dakami amin a nasipultiriro abuyot

Ket matda a maar-arakattot.
Aradasem amin a kalat nga adda
Iti karabukob, ket iti karakaram

Sadiay a di supiaten ti panagulbod
Tapno iti linged dagiti buteng, Jovito,
A berdugo, sadiay nga itabonmi ni Karen

Iti panagliput, sadiay a gaburanmi
Iti bingkol dagiti amin a ladingit.
Awan mabalin, kunami koma.

Kasta ti punganay dagitoy a duadua
Tapno iti  panagsanud iti panagusig
Ket agbiagka iti naunday, Jovito nga asasino

A kasingin ti pannusa. Berdugoka a pudno.
Kettelem amin a klausula ni ayat,
Sandiam iti frase ti panagsiplag

Tapno dagiti agkabannuag a balikas
Para iti ili a dumawdawat iti kararag
Ket iti ngudo ti paltogmo a mapasag.

30 Agusto 2013

No comments: