Ti Sabado a Nangisit

Imutektekam ti Sabado a nangisit,
ti Sabado dagiti nangisit:

nangisit a gagem nga agtimbukel,
agbalin a sangatukel nga innapuy,

niluto iti apuy ti daripespes
ni mannalon iti bengkag

a kukua ti baknang a taga-ili
wenno dagiti mangmangkik

kadagiti ladrilio a balay
a sadiay a ti sariugma

ken napauluan iti kinapimpiman
idi man panawen dagiti Kastila

aginggana ita a panawen
dagiti nangisit nga am-amangaw.

Agpanes dagiti daras.
Agkawilida nga agapon

dagiti ittip a maikiraod
a kasingin ti saraaw

wenno dagiti agkonkonsierto a bisin
wenno tay panaas ti boksit

a mailiw iti napino nga asin,
daytay aggapu iti sabangan

dagiti narnek, isuda
nga agidulin iti asi

iti natulbekan a karatay,
aguyaoy piman iti imatang

santo agideklara
iti panagpakamatay:

ilaok ti natulbekan a karatay
ti darepdepna kadagiti aglalaaw

a beggang ti aron
ket agbirri ti tanem

dagiti makan iti agmatuon.
Aguray ti nangisit a Sabado

iti panagungar dagiti naitabon
a lamlamiong, patiray-ok

dagiti berso ti panagum-uma,
panagbubussog a pannakaltot

a panagangtab dagiti kassaba
ti mabisbisinan nga agsapa.


Aldaw ti Sabado a Nangisit
Marikina

No comments: