Tirtiris

Quos deus vult perdere, prius dementat.
Euripides


Pudno a pukawen
dagiti dios ti dadaulo
iti gulo ken gubat,
aramidenda a makisao
iti al-alia dagiti panagbugsot
dagiti bigat
a mangbiag koma iti maysa
nga aldaw santo manen
maysa iti kinaagnanayon
dagiti malmalanga
idiay Baghdad
wenno dagiti amin nga ili
a sadiay a partuatenda ti kinapimpiman
dagiti liday dagiti balo
wenno dagiti ul-ulila
wenno dagiti soldado
a pauttogen dagiti timbatimba
a dara dagiti di nagbasol
ken dagiti sibabasol,
agtibnok a maidaton
iti altar ti awanan rupa a kabusor
wenno agdadata a kinasaor
kas idi punganay
kas iti pakasaritaan
dagiti amin a kolonisador
aminda ket makidaya
saan nga imbitado iti punsion
wenno iti panaglak-am
kadagiti bendision ti ugaw
a nakabonete iti puraw.

Iti kasta perdienda
dagiti bileg
kadagiti ganggannaet a sao
nga isawang ti dadaulo
manipud kadagiti wingiwing
wenno pasugnod
dagiti daradara a bigat
iti pagbabakalan
dagiti abuyot ti ranggas,
isuda a mangkamkamat
iti kaing-ingas ti pudno
iti ngudo ti paltog
iti derrep ti gatilio
iti rugso ti bomba
ken panagalimpatok dagiti balligi
nga agtunda iti kaasi
para kadagiti ili a punasen
dagiti kanalbuong, aramidenda
a kas tapok a mailaok
iti tambutambong.

Kasao piman ti dadaulo
ti anniniwanna
sana kamatkamaten iti agsapa
no agatiddog daytoy santo
agpukaw iti agmatuon,
aglemmeng kadagiti anito
dagiti bala, dinamita,
wenno amin a klase
ti kapipigsaan nga armas
a mangisagsagut ken patay
iti man Kabul wenno
iti amin a sulinek ti ibit
kas iti kuadrado nga ulimek
kadagiti mosque a paturogen
dagiti natellay nga arapaap
dagiti palasio idi un-unana
wenno dagiti dana
nga antigo a saksi dagiti sirib
nga itan ket maibaratilio
abalbalayen dagiti mannanao,
dagiti mamati iti demokrasia
ti dangadang
nga idasarda kas taraon iti bigat
idiay Lebanon
idiay Tel Aviv
idiay Palestino
uray pay idiay Manila
uray iti amin a siudad
a panggepda a pagbalinen a riro
wenno burburtia
wenno maysa laengen a lagip
a pukawento dagiti panawen
iti amin a sulinek ti lubong
kas iti kubakob ti Iraq
nga inagawandan itan
ti ragragsak.

Miraen ti agballa a dadaulo
ti naraniag nga aldaw:
agingles nga agfranses
ania pay, amin a pagsasao
dagiti amin a natuturay
isuda a manginaw iti kappia
kadagiti tultulang dagiti maidasay
kadagiti tagainep dagiti pimmusay
ken adu pay a panggep a makeltay.



Torrance, CA