(Kuna ti damag: dua nga ubbing ti natirgas, natay;
maysa a masikog ti natirgas, natay; ti sikog, natay)
1.
Dakami dagiti tallo nga ubbing a pinatay ni ayat,
Daytay man ayat a kurimaong ti anges iti agpatnag,
Tallo nga ubbing nga inlili dagiti arasaas iti kannag
Tallo nga ubbing a pinadso ti daradara a kararag.
Itan makitami dagiti eksena iti rinnupakrupak
Itan ta iliblibot dagiti obrero ti pannakigasanggasat
Bangkaymi a di makarikna iti bisin ken tulakak
Kararuami a makikakaasi iti kontra signos ni rigat.
2.
Siak tay maudi a sikog ni inada, tay awag ti amak,
Siak a tartaraudi koma dagiti aggibusen a peggad
Siak nga inaklon dagiti amin a bisin, amin a lib-at
Siak a suni dagiti manangngaasi a mamagparparigat.
Ay, ay, ti kansion ni ina, timtimudek a denggen ita,
Kansion ti masikog kadagiti amin a nasapa a sapata,
Kansion met laeng ni ama, tatang ti riwriw nga araraw
Kansionmi amin itan, dakami nga impatli dagiti aldaw.
3.
Siak daytay ubing nga indaton dagiti ling-et,
Dua a tawen a rag-o iti dua tawen a sipnget
Dua a tawen a sangsangit ti dios a balangkantis
Dua a tawen a nagar-arapaap iti dua nga arbis.
Addaak itan iti terminal dagiti tawtawen
Patingga ti uged dagiti amin a panagbisin
Iti rangkis dagiti tulag, iti tanap ti barengbareng
Agtinawen nga ipupusay iti ungto ti bariwengweng.
Naimatangak amin dagitoy kas ti pannakaimatangko
Ti labes dagiti karayo iti sarita ti naipaanod a barko,
Papel a pagluganan dagiti anek-ek a mapan iti palasio
Anek-ek a pilawen ti presidente, aramidenna a babato.
Awanton ti Jason, kuna ti babai a mannakabalin amin,
Awanton ti Jason, ikarik ken isapatak a napnuan laing,
Paksiatekto ti kabusor iti paulo dagiti daniw a bangking
Pagpugaekton dagiti mannanakaw iti sarita ti nasanting.
Itagbatko iti bato, itagbatyo iti kawaw nga uloyo,
Gibusek ta gibusek daytay gingginamol iti kapuyo,
Patappuaken ta patappuakek ti agukop a kalbaryo,
Pagbalinek nga aglaplapunosan ti bisin iti sarusaryo.
Dagita, dagita a nagita a balikas ti innak man naimdengan
Manipud iti babai a mannakabalin, agindeg Malakaniang,
Babai a puon ken bubon dagiti matikawtikaw a bendision
Isu met laeng a babai a presidente itan dagiti kabron!
Anian, anian a panangpaksiat ti naipagteng a napasamak,
Anian a pannakaumsi dagiti padak nga annak ti adu a rigat,
Dakami amin a dinusa dagiti babaonen ti babai iti tirgas,
Daytay man makakissiw a panagkamat iti anges, mangikipas.
Isu nga itan agballasiwak kadagiti waig ken angin,
Wanawanak ti kaikarian ti kalluto nga inapuy iti asin,
Sakaek ta sakaek dagiti palludip dagiti bituen,
Isuda a nangikari kadagiti sagawisiw iti saem.
4.
Siak tay kararua ti ubing nga aglima a tawen,
Daytay man nakilinnumba kadagiti pangaem,
Nakikammayyet a nangiwagayway iti ar-arapaapen,
Nakitunos iti sam-it ti riaw, "Saan a kinukusiten!"
Iti kablam ti tirgas, nakatarayak koma't daras
Ngem ta narigat ti umanges ken agkuripaspas
Nalang-abko nga insegida ti sabidong a ranggas
Daytay man met laeng sabidong ti Mendiola a rapas.
Idiay, idiay, idi panawen ti sabali pay a babai,
Isuna a babai a kinawesan ti ili iti panagari,
Intumbada manen dagiti adu nga ammami
Isuda a makisinsinnanggol iti pitak ken rabii.
Anian, anian, ta maulit manen ita ti pakasaritaan,
Madagullit manen ti estoria a napait, nakas-ang
Dakami nga ubbing, dakami koma ti mangiwanwan,
Dakami met ti iramanda iti balubal, pagang-angawan.
No comments:
Post a Comment