Kenni Propesora Prescila Espiritu, iti aldaw ti panagretirona, iti Unibersidad ti Hawaii iti Manoa, Septiembre 9, 2006. Naibasa iti bangkete a naangay a para kenkuana.
Kas kadagiti anito ti puli, kunaenmi ita kenka
Manang Prescila, maestrami: degdegam ti pia.
Degdegam ti regget ken karadkad ti karararua
A kadkaduami iti daytoy a pinabarom a kassaba.
Dika agbati, kunami ita kenka, dika agduadua.
Dika agsarimaddeng iti yaaddang tapno agsala
Dagiti espiritu iti kumpas dagiti nasam-it a dayyeng
Daytay makayepyep a timek ti napasubli a kutibeng.
Iti puli nga agsubli ti amin, amin a kas daton, kas patawid.
Iti lengguahe dagiti ulimek nga imbatim iti sagrado a siled
Dagiti ribo a lagip, sadiaykami nga agbirok iti salakan
Sadiaykami a mangaramid iti kontra ti pannakiyaw-awan.
Adu ti nakautangan, adu a pannakaisalda-gatang
Kadagiti tikaw ti sao, ti semantika ti kaipapanan
Kas iti singin a libro ni ayat a nangilalaeman
Nangikitikitan kadagiti amin a pagimbagan
Ti nakem kas iti likawlikaw dagiti balikas ni sanaang,
Ni anus, ni rigat, ni balligi, ni ragsak, ni leddaang.
Ay, ay, amin dagitoy ket awaganmi ida a sibibiag a saksi,
Kaduami a mangibalangat iti korona ti inka panagtagibi.
Bilangenmi kadagiti ramay ti siglo dagiti pammateg,
Di maungpot-ungpot a panangikankanawa iti bileg
Dagiti kur-itan iti panagindeng wenno panagtalawataw:
Ay, ayna, ngem agretiro ti pusomi nga agam-amangaw
Ta sika, sika manang a maestrami iti adu a dayaw
Sika ti paraisuro iti naruay a kursada ni kayaw.
Ibatim ita ti langit a nakitam kadagiti timek ti agpatnag
Allawatenmi ti anting-anting ti sao, kakaisuna a kalasag.
A Solver Agcaoili
Septiembre 9, 2006
Honolulu, HI
No comments:
Post a Comment