Manong Amado

Ken Manong Amado Yoro, kas pangbayad iti adu nga utang a naimbag a nakem

1. Allintok
Inamadmo no ania ti allintok,
Insuratko kenka a dagus:
Panagkatangkatang daytoy
Ti agallaalla a nakem
Ti ubing a saanton nga ubing
Umaddang a saan iti pitak,
Daytay man maigamer
Iti risay-baboy wenno mapanen
Wenno dagiti awanan nagan
A sinsinan-gubat wenno linnemmengan
Iti nadungngo ngem tapuktapok a paraangan,
Duduayyaen ti silnag ti bulan,
Daytay naumbi a lawag a sumarot
Kadagiti agkoro a garakgak
Dagiti ubbing
Iti bislak a pagsiato
Iti tuwato no kapudot ti tiempo
Iti abalabal no panagtutudo
Iti layus a mangikisap kadagiti gabat,
Rugit, peggad, alikaka, buteng, danag
Iti panagdaliasat iti waig a nariper,
Daytay libeg ti saning-i ken saibbek
Iti yaadayo, ipapanaw iti puon ken ramut
Tapno maisadsad iti puyupoyan
Dagiti sierto nga allintok
Iti tangatang kas iti dakulap
Iti pannakapnek dagiti ragsak.


Ay, umaddang nga agallintok,
Agallintok nga umaddang
Ti ubing a di ubing
Ti amin nga ubing a di ubing
Isuda a mangan uray awan saing.

2. Ayat
Nia ket, manong, sika ti kampeon
Ti maipapan ti sarita a daniw
Ti kammayet nga ipakdaar dagiti saltek
Iti agmalem a panagkebbakebba ti langit!

Kasano koma a sawek ti madagullit
Nga isusuek ti raya ti init
Iti agur-uray a danum
Ti madagullit a panangbagkong ti tudo
Iti sikakayang a talon
Ti panangaklon ti kabbukar a rosas
Iti arbis wenno arimukamok,
Ikutanna daytoy iti barukong
Ulsanna kas maladaga iti saklot
Lallalayan kas inauna a di makaturog
Ilili kas inaudi nga agpaspasugnod.

Agayos ta sumuknar ti atiddog a karayan,
Agkumbawa santon ikutan ti baybay
Idinto ta ti rabii tagibienna ti aldaw
Idinto ta ti aldaw tagikukuaenna ti sipnget
Ket iti panaginnagaw ti sipnget ken lawag,
Marugian ti orasion ti managsarsardam
Nga apiras, di mangikankano, makigingginnanas.


3. Arte
Testigoka, manong, awan patinggana a testigo
Ti darikmat. Agbibiagtayo iti apagapam
Ngem tukmaam ta riputem dagiti kanito
Kadagiti antigo a linabag ti daniw
Nga isursurat. Dimon sa ketdi ammo
A kadagiti agkabannuag nga agbirbirok
Kadagiti paulo dagiti daniw
Kadagiti karayan a pagkugitan
Kadagiti aripit a pakaikalian ti subukan
Kadagiti kabayawasan a pagkettelan
Iti makalawas a panaglunit ti sugat
Agbirokda iti pagdayas kadagiti balikas
A putarem kadagiti kaunasan
A putarem kadagiti makapabang-ar a rabii
A panagmaymaysa iti Oahu,
Ti isla nga abong dagiti amin a lagip
Nga imbatim iti ili
Nga iruknoy iti sabali.

4. Araraw
Agretirotayo iti kalendario
Dagiti regta ngem di mamingga
Ti panagsariwawek ti barukong.
Naganan ti anghel a kasisigud
Ti tagainep uray no adda tadem iti uloanan
Wenno bawang a nayimpardible iti puso.
Agpasiar dagiti batibat sagpaminsan
Ngem sumiripsirip da laeng kadagiti rekkang.
Nasimbeng ti panunot ti tao a nakapudno
Nargaan ti turog ti mannaniw
A nagaddakayo-apo.