(Daytoy ti orihinal ti imbasatayo a daniw, kas kiddaw iti 17th Divine Word College Alumni Association, iti paskenda a naangay iti Pacific Beach Hotel, May 5, 2007, Honolulu, HI. Inimbitarannak ni Manong Amado Yoro iti daytoy a panagguummong, ket iti kabayatan ti pannangan ken panagraragsak, inkiddaw ni Bernie Munoz ti innak panagdaniw. Iti nagbukel a lamisaan a panganan ti nangikuradaddengak daytoy a daniw, panagikuradaddeng a sinaksian dagiti katugawko a kas kada Dra. Estrella Pada Taong ken Manong Paul Taong, ni Danny Agsalog, ken dadduma pay.)
Sumurnadtayo
manen ken manen
Manglagip iti adayo
kadagiti baybay
ken bengkag
Isu daytoy a lagip
ti maikanatad
iti panawen a kanito met
segundo ti agnanayon
iti lukong ti palad
Simmangbaytayo
iti daytoy nga ili
iti labes dagiti allon
adayo kadagiti lua
a maibuyog
kadagiti binatog dagiti daniw
a mayurit iti nakem
a nagalusan itan mabibi nga isem
Italdeng ti bagi
kadagitoy a buya
kas ita, iti daytoy a rabii
nga agbalin nga agsapa.
A Solver Agcaoili
May 5/07 UH Manoa
No comments:
Post a Comment