(Ken Aristeo Padrigao, periodista ken komentarista iti radio nga impatlida, Nov. 18, 2008, Gingoog City, Filipinas.)
They trailed him from home to school. As he got off his motorcycle to drop his 7-year-old daughter at the school gate, one of the men shot him in the jaw in front of the girl, police said. C. Rodriguez, Inquirer, Nov. 18/09
1.
Diak ammo no kasano ti mapasag.
Aristeo Padrigao a pudno ti naganmo
Nga iti sango ti anak ket ti final a pammadso:
Bala iti lasag a kasta unay ti bara,
Tured koma a nabisked
Kas iti darang a narangrang a sagut
Iti ili a ngem ta tilpakenda
Ti pispis kas iti prinsipio ti wayawaya
Ket ti komunion iti daytoy
Nga imaruda iti ngalay ti dalan
A tanem dagiti masumar a balabala ni ayat.
Sinno dagiti birkog, sinno dagiti mannanakaw
Iti pannagibim iti balasitang, iti panangipateg
Daga a nagrutingan dagiti amin a kita ti balubal
Iti puso man wenno iti palad?
Kabsat a mangiwarwarnak kadagiti peggad
A kasingin dagiti di makapudno a pluma
Dagiti daga a di met kadagaan
Ta agur-uray piman kadagiti karakaran
A maiwa kas iti pannakaiwaris ti utek
A ti gatilio ti makaigapu ti nagabay a salakan?
2.
Saan a gapu iti agsayasay a dara, kakaen iti dangadang.
3.
Ti makaigapu ti saning-i no ti di pannakaipatli ti darepdep
Dagiti sabong a naitani iti balligi.
Ngem ita, kasano a dagiti petalo ti rosas a nalabaga ken puraw
Ken nagmaris iti daytoy nga am-amangaw
Ket agbalin a pangontra kadagiti sulisog ti di mamingga
A panagbilang iti pannakatay
Nga iti sango ti anak a kaippusing iti balitang
Ket maysa itan nga ulila kadagiti apros?
Ayna, ti karayo anak koma a dungdungnguen
Iti panagayat ti ili
Ti santifikado koma nga agas ti bannog
Iti agmalem a panaggudagod
Iti kasla turumpo a panagwerret a panagpuligos
A pannakigasanggasat iti kalsada dagiti mabayadan
A miron kadagiti idea ti panagwaywayas ti puso
Kas iti isip ken nakem ken ti dulang a namsek
Namnama ti bagas, kilabban a makirog, panaglablabonan
Koma nga iti bigat-aldaw-rabii a mataog.
Wenno mannabidong iti bannawag kadi itan
Ti mangisuno kadagiti panggep nga ita rabii ket
Matagainep: kas iti kinnabsat nga adda iti kunniber
Dagiti nabibileg, dagiti heneral dagiti amin a laingtayo
A di met mangted talgek no di ket saning-i kas iti ibiatmi
Iti ipapataymo nga ipapatay dagiti amin a sasainnek
Nga itan ket agbanag manen nga awan, ampaw
A sabsabong ti dila dagiti am-ammotayo a mangmangkik?
4.
Saan, kunam,
Ket iti kangitingitan dagiti danag, iwaragawagmo
Ti karbengan nga agbiag iti abstraksion dagiti manglanglangan
A ragsak wenno panagsugel tapno ti kaasi dagiti nakakaasi
A kas kadatayo ket agbalin nga araraw:
Ngem ta gudasenda amin a sayaat
Ania ngamin ta ti tured ket virtud
A mangiwanwanwan iti nasipnget a dalan ti Gingoog
Ti siudad dagiti mabisin a mawaw, mawaw a mabisin
Kadagiti balikas ti ili a sibibiag.
5.
Kasano ita nga isublimi ti angesmo manipud iti tapok,
Manipud iti agsapa a saksi ti pannakagsat ti anges
Tapno iti agmatuon ket maitabon ti gargari
Ti biag a nasayaat, nalimpio, natalged
Para kadagiti bagyo a kas ita a dumarop iti arapaap,
Maar-arrakattot nga agpaarayat.
Maikaseisenta daytoy a pannakatay
Henesis amin dagiti ti paltiing ti panagungar.
6.
Agbalingtayo, ket ipatlida uray dagiti aldaw
Iti kangitingitan ti panaglalaaw.
Seisentauno ti sumuno a ranggas
Iti ili dinesgrasia ti barrairong a balikas.
Hon, HI/Nov 18/08
No comments:
Post a Comment