agparnuayda
kadagiti kuddakudda
manipud kadagiti balikas.
Ngem sakbayna,
agisibbodda
kadagiti manto
sadanto agsuek
kadagiti bariwangwang
ti sipnget
ket sadiay nga awatenda
ti kangisitan a gargari
nga agbirngas
iti bariwengwen
ti an-anek-ek.
Adu a sao
a pimpiman
ngem di met ngarud
agsiuman
dagitoy kadagiti rikna
a nasantuan.
Di ket ta panangiraira
iti bagsol, iti bakrang
kas iti ngiwngiw
sa iti karubukob
sa iti dila
tapno
iti aldaw dagiti kuddakudda
a kadagiti dakulapda
ket maipasngay,
awagandatayonto
amin iti balla.
Dagiti mannaniw
ti tulisan dagiti pudno
nga iti linabag
ti pananglimlimo
ket ti pangngurungor
iti agpayso.
Padaraenda dagiti daniw
kas iti kuddakudda
agingga nga iti bassit nga abut
ti agong ket agsayasay ti lua.
A. Solver Agcaoili
Hon, HI Feb 14/09
No comments:
Post a Comment