Wagas ti Panagkettel iti Biag Tapno Makaungar

Garden Grove, Calif. – A man shot and killed himself in front of a cross inside televangelist Robert H. Schuller's Crystal Cathedral on Wednesday, police and church officials said. The man handed a note and his driver's license to two ushers, walked to the cross and then shot himself in the head as he appeared to be praying, Senior Pastor Juan Carlos Ortiz said. G. Flaccus, AP Report, Feb. 18, 2009. 

Iti kristal a katedral daytoy
a buya: maysa a lalaki
ti agbirbirok iti panagungar
iti sakaanan ti dios a natay.

Maysa nga akto ti tularamid
ti sumuno nga eksena
iti aldaw nga agpampannimid
a dagiti oras ket agresesion
iti panamati iti paspasagid.

"Daytoy ti lisensia," kunana
sa iti isem ti malmalday
ti kabulon ti ima a mangiyawat
iti nagan iti tinta nga ukasen 
ti pannakatay. 

"Daytoy pay ti maipapan 
iti lugan iti garahe
a no di umay ti umarayat nga ayat
ket sadiay nga ilugan ti bangkay
dagiti tagainepko a maidasay
kakibin ti bagi nga agrupsa
kadagiti ar-araraw."

Saanna a kuna ti maikadua
no di ket panggutad daytoy
kadagiti linabag tapno maikuadro
ti rukapi a biag.

Mapan ti lalaki iti altar
ket iti sakaanan ti nakalansa
sadiay nga alawenna ti panagbalaw:

sadinno a langit sadinno nga impierno
sadinno a kalbario sadinno a purgatorio
sadinno ti pakaikipasan ti pammadso
no ti panagmurir ket adda iti ulo 
dagiti sulpeng a rebulto? 

Kas kenkuana, di agkir-in
ti kristal a katedral, nakamattider daytoy
iti agpampannakkel nga aldaw
dagiti panagruruting dagiti lumot
kadagiti di-agbara a dapan ti dios.

Gibusen ti lalaki ti kanito
iti panaburak iti ulimek
iti kristal a balay ti di matay a dios:
ti ngudo ti paltog
iti sentido a balay ti barukong
a kasinsin ti abungot
wenno manto dagiti pasugnod.


A Solver Agcaoili
Hon, HI/Feb 18/09 


No comments: