1.
Iti katengngaan ti lagip ditoy adayomaimatangak ti asideg a puso
iti mailiw unay a karayo.
Mano pay a ramay ti masapul
kas kasukat dagiti bulan
lawas aldaw ken ti regget
a panagsubli iti Kailokuan
a kadagiti sirmata ket itan
maysan daytoy a rurog
ti maledleddaangan a kur-itan?
Kasano koma a sublian ti pinanawan
nga anniniwan tugot samiweng
uray pay dagiti ay-ayam a barruga
kadagiti kataltalonan
dagiti panngsurot ti dagiti mata
a masmasnaayan kadagiti ullaw
nga iti tangatang ket agbirok iti pannakapuruto
daytay panagwaywayas iti asul a law-ang
no iti panasubli ket ti bangkarote
a lagip iti bangkarote met laeng
a panagpadanon ti kaibaan?
Kas iti kapitolio a puraw, kaarngi
daytoy ti am-amangaw ti linteg a militar
iti panawen ti isusuko ti ubing a nakem
iti ang-angaw ti dadaulo a ti ulo
ket banawbaw, kawaw kas iti derrep
nga iti agsipnget ket ikut ti sidunget
ta kadagiti baul ti puso nga inna
a ti akkub daytoy ket inna imbalunet
ket ti kakaasi a bigat nga iti bisin
ket agkudaap, aglusdoy, agarapaap
iti agap-apas a katay a kasingin ti tilmon
iti pannakabuya iti darepdep ti labon
a kadagiti sinublan ti ili ket gawat
nga iti laeng karabukob a dumanon:
ikut daytoy dagiti adu a lamlamiong
pannakikurratsa dagiti panawen
iti law-ang a mangliwengweng
maysa a barangabang awan gibus
a samiwen, kantada a maikadua
iti Kailokuan a pinanawa
a sublian koma ngem awan met dalan
dagiti matanso a kaipapan
dagiti pangngeddeng ti karayan Padsan
weeno lumlumned a torre, kas pagarigan
ti natayag a batonlagip ti duogan a kalman
a kadagiti latigo ket ti dara a naparkagan
kadagiti urat, kudil, muging, lilidduokan
laglagip nga iti panagubing ket ti palimed
ti managbabain a subukan iti derraas ti teppang
nga aglansad iti darang umuna a pannakaiyaw-awan.
2.
Iti bantay ti Manoa ket ti panagtannawag
daytoy iti sabangan ti Waikiki,
kas iti panagur-urayko iti kalendario
a kadagiti aglabas nga aldaw
ket di man pulos makiki. Awan gargari
iti kasipngetan ti agar-arudok
a rabii iti bakras dagiti turod
a kadagiti iduldulin a saem iti lusod
ket agam-ammimi. Saan a kas karina
ti tumayab, mapan kadagiti asul nga ulep
uray iti panawen ti sukotsukot a bullalayaw
kadagitoy a lugar iti saklot ti namaris
a tagainep ditoy nga adayo a lugar
nga asideg ti marabrabian a ladingit
a manglangan iti panagsubli a panagpanaw.
A Solver Agcaoili
Manoa, HI/Oct 22, 2009
No comments:
Post a Comment