Maestro, Maestro

MAESTRO, MAESTRO

(Ken Prof. Julius Soria, iti pannakabigbigna,2009 UFCH Progress Awards for Education)

Ket itan ti jusga: sika ti naindaklan

Maestroka ti puli nga Ilokano itan

Ti pammigbig ket din mainsasaan

Ta sika, maestromi, ti pagpadronan.

Kadagiti an-anus aramid a naruay

Sika, maestro, di kaano man magabay

Ta inka kadagiti dis-oras nga iti sayaat

Ket sadiay a di masuplian ti panagayat.

Isuronakam koma ngarud kadagiti ejemplo

Nga iti kaadda dagiti kibaltang ken riro

Ket idiay a sirigem iti wagas nga asintado

Ultimo a pamuspusan a panglinteg killo.

Ta kasta ngarud, maestro, ti aramid

Kasta nga iti dap-ayan ti ili ket tawid

Sika itan ti mangibunannag iti rumbeng

Nga iti panaglablabes ket panagparbeng.

Ngarud kenka, maestro, nga inkam ita isaad

Panagtamedmi iti talugading a panagitagad

Ta kas kadagiti adalan kasta met ti mangadal

Iti daytoy a biag ket rebbengem ti mangispal.

Panangispal iti babak wenno kisang ti isip

A kadagiti ima ken laing ket inka mairaip

Ta ngarud, sika, maestro, sikat’ napusgan

A kadagitoy nga aldaw ket sikat’ wanwan.

Kablaawandaka, agtamedkami iti saguday

Itedmi kenkat’ pammadayaw a rumbeng unay

Ibulonmi daytoy ti di maungpot nga araraw

Nga iringpasmot’ marismarisam a bullalayaw.

A Solver Agcaoili

Honolulu/Okt 17, 2009