Tarindanum
Addaak ditoy, iti katengngaan ti panagarapaap
nga Amerikano, ngem lukagennak, sika
a tarindanum dagiti lagip iti kataltalonan.
Ilokanoka kadagiti silaba ti panunot
nga agallaalla, kas ti sennaay iti barukong
a mangiginggina iti Hawaiiano a pulkok.
Bumaringkuasak manipud iti ridep
tapno sangnguenka iti kada addang
nga agtunda iti lamiis iti Enero a rugi
dagiti bayakabak, sa dagiti aggangganat
nga arbis, sa dagiti makapungtot a tudo
nga iti agpatnag ket agbalin a layus
kadagiti dakulap dagiti makisiudsiudadano
iti daytoy nga ili. Siak dayta, wenno
maysa kadakuada nga iti panaglua
ti mail-ila a langit kadagiti mabibbibi a kapanagan
iti Kunia ket dagiti maintar-intar a kararua,
dagiti Ilokano a mannalon nga iti malem ket agpakada
kadagiti kinasinnanggol nga inurit,
kadagiti kinabalubal a kinelleng
tapno iti panagsaknap ti Waipahu
a malem ket ti agsipnget kadagiti amin
a panagmalmalanga. Iti komedor
ket ti panangsango iti pangdengngep
iti rusok, ti ballog a manok
nga iti sabali nga isla ket agpakemmeg
tapno iti latokko ket ti mabisin a labay
a para kaniak, siak a naglako iti pia
ken karadkad iti imigrante nga agmalem.
Iti pannakayepyep, sika, tarindanum,
sika ti bunga dagiti amin a kontrata
iti panangiyidda iti bannog. Iti arinunos
ti de-kolor a tagainep ket addaka sadiay,
kadagiti ginget ken sikkusikko
dagiti balikas, saan a maibinggas
iti pakauna ti salaysay. Paan-anawaka
a panaas kadagiti saka, tarindanum, iti baetan
dagiti agbabasa a ramay ti mangrikrikna
iti kaawan kadagiti nakariingan a kinelleng
dagiti agpamfandanggo a sellang ni mannaniw
nga ama, ni managduayya nga ina.
Tarindanum: ipalagipmo kaniak
dagiti amin a napalabas. Riingennak
kadagitoy a bangungot. Iti pannakilumlumba
kadagiti naridam nga oras kadagitoy nga aldaw
ti panagtawataw ket sadiayka kadagiti darikmat,
agbalinka a bitegbiteg, sugat iti nasalamangka
nga ayat. Tarindanum: agindegka iti pannakailibay,
kadagiti pungan a nabara, kadagiti ules-Ilokano
nga aggurigor tapno iti idda ket ti isip nga aginana.
Tarindanum, sika a palagip, umayka. Umayka.
Waipahu/
Enero 15, 2012
No comments:
Post a Comment