Daniw para iti kabsat a pinatay ti bileg

Duapulon a tawen ita a sardam. Ditoy a naibisibis ti daram. Nakikammaysa dagiti asugmo kadagiti naganus a bulong ti tabako. Kalaegan itan nga aruyotan dagiti tedted ti idatonko a kandela. No koma laeng agkalaegan met ti lagip. No koma laeng kas ti sugat, agpiglat. Anansa ta agsubli ita ti bursi, dumegdeggang ita ti dara ti lagip. Piman, addaka ngata koma a kaduak nga agtaltalaytay iti tambak ti bisin. Addaka koma ngata a kaduak a makitagtagay iti rigat wenno kakinkinnatawak no padpadasenta nga iwallages ti puon dagitoy a kinakurapay a nariinganta. Daniel Nesperos, 22 Nov 2014, iti kabsat. Manipud iti FB-na.