90,000 a hello a mapan idiay Mars

90,000 a Hello ti Mapan idiay Mars

Radio telescopes on Earth will beam 90,000 messages to Mars on Friday to commemorate the launch 50 years ago of the first robotic probe to visit the planet., Irene Klotz, "Earthlings to send 90,000 hellos to Mars," Reuters, 27 Nov 2014. 

Anansata ti pay agkir-in ti tao
tapno koma sagidenna ti kaawan
iti daga, daytoy a Daga
a ti piskel ket adda a mailako
kadagiti makabael a gumatang.
Uray pay ti panunot kas ti buteng,
dagitoy ket ar-artiok kadagiti sinandios,
isuda nga agtagikua kadagiti amin a libunglibong
tapno ditoy ita ket ti panagarapaap
iti sabali a planeta a sadiay
ti biag dagiti addaan biag
ket mataginayon.

Isu a kastoy ti aramidentayo,
datayo a taga-Daga a di met mangtagikua
iti daytoy: ipatulodtayo ti 90,000
a hello, ti isu met laeng a panagmag-anka
kadagiti siudadano iti ballasiw a lubong.
Namak pay no adda agindeg sadiay,
aduda a kas kadatayo,
ngem addaanda iti kinalinteg,
talinaay, bileg iti panagparnuay
iti metafora dagiti saduday
tapno kadagiti linabag
ket makitadatayo, maammuanna
ti maminribo a kinakurapay
manipud sellang agingga iti puso,
manipud bulsa agingga iti apro.
Mangurkuranges, kunada,
ket pakapilawagan dayta,
a kasla ketdin ti panagsagaba
ket gusto, kaay-ayo, wenno mutia
a kadagiti sabunganay ket matnag
iti agsapa nga agsampaga dagiti agbukar
a karakara.