1.
Adu dagiti pangngarig iti isip
nga agbirbirok iti lengguahe.
Kasda man laeng agruting a sanga
wenno murumor iti nadam-eg a daga.
Ngem no dadduma aglaladut
dagiti makusbo a ramay.
No madomingguan ti panunot,
makidinnanggay daytoy
kadagiti aginana a damag
malaksid iti pannakabitay manen
ti kabsat iti ama ti diktador
isuda a kabusor ti naindemokrasiaan
a balikas ti kabusorda met laeng
isuda nga aggapu iti puraw
a kapitolio dagiti sabsabali a pudno
kas iti panaggapu met
dagiti adu unayen a pananglimlimo
kadatayo ti palasio iti karayan
a nabuyok.
Minassayagen dagiti siglosiglo
a kari kadatayo dagiti amin a langit
nga impasngay ti dios
ket ti balikas a salakan
ti daniw a di sumangpet
masilpo-ti-riro.
Mananggulib
a dadaulo dagiti umili
dagiti agsiuman a riknatayo
no kasta nga agikay dagiti daniw
kadagiti mail-ila a sellangtayo
datayo a kasingin dagiti leddaang
a sagut ti ili kadagiti malmalday
a binatog ti daniwtayo.
2.
Umanayen nga almusar ti masiluan
a pangngarig iti nasapa unay
a panagsaraaw ti panunottayo.
A S Agcaoili
UH Manoa, En 14/07
No comments:
Post a Comment