Panangiras

...intay mangiras ket ibatitayo ti apuy nga inudo dagiti nakapuy...
Jim Agpalo, Enero 15, 2007

Maysa a seremonia ti panangiras.
Masapul ditoy ti laing ti mannanakaw,
daytay nasanting a mangurimaong
iti atang iti anito nga aniwaas
a karkarma dagiti anniniwan
dagiti minasakerda nga ayat
kadagiti balikas nga ukopan
koma ni mannurat ngem ta, iti rengngat
dagiti ariangga nga awan labas,
adda sadiay ti pangta ti tippuog
dagiti mannaniw a mannakabalin-amin.

Agsaknap ti sipnget uray iti agmatuon:
iti barukong, agdudupudop sadiay
ti lamiis, ket lagipen dagiti sumungad
nga aldaw, saan a ti napalabas,
ti aldaw a kari dagiti sardam iti parbangon
a ti inudo ket maysa a birtud
wenno mannubbot a komunion
pannakiranod iti ostia ti kinnadua
ti palad iti apuy, amin a palad,
aginudoda kas idi un-unana
ket iti ulimek saritaen ti rugi dagiti gibus
ti pungdol wenno beggang wenno atong
nga imemoria dagiti mata
wenno isem manipud iti rupa ti agsapa.

Lawlawentay ti apuy
ta makainudo dagiti nakapuy
ta agpakired dagiti mesias ti padso
nga agnagan iti padpadto.

Birokentay ti kasapuego
kadagiti bassawang: sadiay a residente
ti panagiras kadagiti makabiag a sao,
agtagilasag kas iti dungngo ti kapuyo
kadagiti bibig a mannanao.

A Solver Agcaoili
En 15/07
Hon, HI

3 comments:

Ka Iddo said...

agkapuyo a bibig? hehehe!

Ariel said...

wen, agkapuyo ti bibig dagiti di mangrespetar iti kisantuan ti sao, ti kinasagrado ti balikas. a writer ought to write, not talk endlessly and without sense and meaning. otherwise, that writer pretending to be one should change and file his/her candidacy for a senatorial seat in the unfinished land of our forefathers. these are premises, for me, ka jim, and they can come off so strong to offend. but we must start some where with our act of writing, i guess.
hats off to you!

Ariel said...

hola, hola. testing itong blog na ito!