MENSAHE
Maysa a bukbukod a pakaidayawan ti mangted iti mensahe ken mangkablaaw kadagiti amin a makipagpartisipar ken makigamulo iti 3rd NAKEM International Conference a maangay iti St. Mary’s University iti Bayombong, Nueva Viscaya, Filipinas. Partikular a pakaidayawan daytoy gapu ta makapaglilinnangen manen dagiti amin a mangipatpateg iti kultura, kannawidan, ken kananakem dagiti amin a taga-Amianan.
Paggaammotayo a saan a naynay dagiti kakastoy a pasamak ket ngarud, umanayen daytoy a pakaigapuan ti pannakaamiristayo a panawenen tapno irupirtayo dagiti kultural ken lingguistik a kalintegan ken karbengantayo—dagiti karbengan ken kalintegan a gapu iti saan a balanse ken nainhustisiaan a panagtingiting iti anag ken birtud ti pluralismo a kas kasalun-atan ken kasamayan a wagas ti panagbiag iti maysa a komunidad ket amin dagitoy ket ipaspasuli, di ikankano, ken et-etsapueraen ti kultura ken lengguahe nga adda iti sentro ti poder. Masapul ti pananggibus iti kastoy nga ayus—ken wagas—ti panagbiagtayo bilang maysa a pagilian a multikultural ken multilinggual.
Adda politikal a semiotika ti kastoy nga aramid—ken ti simbolo dagiti addang ken tignaytayo ket adda iti bugas ti panangirupir ken panangilaban iti kalintegan ken karbengan. Ngarud, ti dawatentayo iti maysa ken maysa ket ti bendision iti maysa ken maysa—daytay sagrado a basbas a mangted iti sarikedked iti nakem, kappia iti panunot, ken tanang iti panaggaraw. Ta ti sirmata ti NAKEM Conference ket daytoy: ti pannakataginayon dagiti amin a kultura, kannawidan, lengguahe, ken kananakem dagiti amin a kultural a grupo iti parte ti Amianan—iti deppaar dagiti naiwalinwalin ken inwalinwalin dagiti dominante a puersa ti gimong, nga iti baet dagiti kakastoy a nakas-ang a paspasamak ket nagtalinaed a simumurmuray ken sisasagana a mangsaranget iti amin a karit tapno laeng masiguro ti pannakataginayon dagiti amin a bambanag a mainaig iti kinataotayo.
Iti baet dagiti agsasamusam, agsisinnupiat, ken agsusupadi nga interest iti tay-ak ti arte ken siensia iti kinatao ken iti gimong, maysa laeng ti konstant: ti di panangipalubos a masibbarut kadatayo ti kultura ken pagsasaotayo. Daytoy ti anag daytoy a kumperensia. Daytoy met laeng ti anag ti NAKEM a kas maysa a tignay. Ngarud, naimpusuan a kablaaw ti itedtayo iti NAKEM Conferences Philippines, Inc.—a pakairamanan dagiti nagkaadu nga universidad, kolehio, ahensia a pribado, ken ahensia ti gobierno—gapu iti daytoy naisangsangayan a gannuat. Agbiagkayo amin!
Aurelio S. Agcaoili
Program Coordinator, Ilokano Language and Literature, UH Manoa
Presidente, Nakem Conferences Inc. (International)
No comments:
Post a Comment