Sirmata

TI SIRMATA TI NAKEM CONFERENCES

A. Solver Agcaoili
University of Hawai`i & Nakem Conferences (International)


Kunada a mainaw ti amin iti idea, nga iti idea nga agruting dagiti sabali pay nga idea a mangdagdag kadatayo tapno manen ken manen ket sirigentayo dagiti padastayo, ti gimongtayo, ken ti universotayo babaen iti lente ti adal a makaisalakan ken makaited iti pannubbot kadagiti amin a babantot ken dagensentayo.

Kasta ti Nakem Conferences.

Nangrugi daytoy iti idea—ket iti idea met laeng a nagruting. Ket ti idea iti komitment iti dayta nga idea ti mangpaspasantak kadaytoy agdama a realidad ti Nakem Conferences a kas taripnong ken tignayantayo amin.

Iti pannakarambak ti sangasiglo a padas dagiti Ilokano ken aminen a taga-Amianan—ken ti lohikal nga extension daytoy, dagiti Filipino—iti Estado ti Hawai`i, dita a naimula ti idea maipapan iti Nakem Conferences.

Maysa laeng ti gapuna: ti pannakasebrar dayta a naisangsangayan unay a padas dagiti Ilokano ken taga-Amianan ket ti pannakaitan-ok metten daytoy a padas iti pakasaritaan.

Ngem iti dayta a panagselebrar ket ti panagpanunot, panaganalisar, ken panagkritikar met tapno iti kasta ket kankanayon a mapabaro ti balabala ken naguneg dagiti adal maipapan iti kina-Ilokano ken kinamakipagili iti deppaarna ti Amianan.

Ti produksion ti adal maipapan iti kinamakipagili iti Amianan ti adda iti pantok ti kastoy a panagtitimpuyog a nangrugi idi 2006 idiay Universidad ti Hawai`i ken nasunotan manen idi 2007 idiay Mariano Marcos State University ket ita a tawen, iti St. Mary’s University.

Awan ngarud gamden ti Nakem Conferences no di ti pannakapartuat kadagiti adal a maaramat amin a taga-Amianan tapno iti kasta ket maitandudo ti kananakem, kannawidan, kultura, ken pagsasaoda.

Daytoy a gakat ti agserbi a pagibasaran no kadagiti sumuno nga aldaw ket ti Nakem Conferences, babaen ti basbas dagiti nagduduma a komunidadtayo, ket agbalinto daytoy a kas maysa a narukbos a kayo a paglinongan—ken pagtaklinan—dagiti amin a makipagili iti gimong dagiti taga-Amianan.


Hon, HI
Mayo 12/08