HAVANA - The Cuban boy at the center of an international custody battle eight years ago has joined Cuba's Young Communist Union. AP Report, June 16, 2008.
Elian, nakitaka kadagiti siled iti isip.
Simmangladak met iti Amerika idi a kas kenka,
Siak tapno saritaek ti estoria dagiti mangmangkik
Iti panagisuro iti pagsasao dagiti nagdappat
Sika tapno agleddaangka iti ipupusay ti ina.
Kaduam ti nangtagibi kenka a nagdaliasat
Kadagiti taaw ni saem, buteng, sa dung-aw
Wenno tagainep kadi ni wayawaya iti Miami?
Ngem daksanggasat ta nakeltay iti ipupusay
Dagiti regget iti agkabannuag a panunot
Iti duogan a pigsa iti pakinakem.
Buyaenka iti Fox News kas met iti CNN
Ket ti ubing a langam, seis años, Dios por santo!
Joven, juventud, ania a gasat, ania a pannakaikawa
Manipud iti nasarangsang a katawa idiay Havana
Agtunda iti didigra dagiti kamera, kas iti dangadang
Dagiti darepdep: ania a wayawaya ti adda kadagiti danum,
Nalamiis a paglangoyan ti kararua a matmaturog
Wenno agdudungsa, di makaammo piman iti gasat
Manipud kadagiti baraha, kas iti diskurso ti pangulo
Iti bangir a nasion, kas iti unget ti pangulo ti nasion
Dagiti kasingin ti maladaga nga isemmo a nakabakasion?
Isublidaka iti naggapuam, ket ita
Kalpasan ti sangasiglo a pannakaiwawa,
Lumaemka iti puso ti ili
Kas iti bagi ti kakkugit a karkarma
Ti ubing idi nga iti ayat agpalpalama.
Marikina, Filipinas
Hunio 16/08
4 comments:
naragsak a panagapon, Maestro. Regards kada Madam kenni Ayie ken tay nalibnos a dayagmo.
got ya. nalpasent ti nakem, ngem ti language ken culture advocacytayo, mangrugrugi pay laeng. kas iti tignayam, sapay ta kasingintayo ti balligi.
ipostem man ditoy daydiay impresentar tay anak da prescy ken butch macansantos, ka ilyong... ania ti kunana?
ngek...2007 met gayam, hehehe!
Post a Comment