Sarsaraaw

Dengngep ti masapul
iti rusok nga iti kaltaang
agkurri nga agsaraaw.

Iti sardam ti rugi ti ritual
pammespes, iti kanito ti pul-oy
a malaes a kadagiti sabangan
ket amin a pananggulib
ti ili kas iti sagut ti baybay
a kadagiti allon ken après
ket kinabuklis. Saan kadagitoy nga ili
ti bendito nga apros ti alikuno
nga iti aginaldaw a sarita
dagiti dadaulo ket ti salakan
iti manglimlimo a diskurso.
Demokrasia kano iti kada subo,
kada tilmon, kada panangnanam
iti ipauneg a tagainep kadagiti buslon
nga iti panagbisin ket ti ladawan
kimsial a malukong.
Wenno latok a di makuti.
Iti ilin-ili ket kastoy met laeng
a buya, awan duma kadagiti ik-iking
ti biag nga agtabtabugga.
Agbugsot amin nga agbugsot
malaksit dagiti ukom ti dukot,
wenno soldado dagiti buteng
wenno senador dagiti ganggantil
wenno dagiti diputado dagiti amin
a klase ti pannibrong, manipud
darepdep agingga iti panaguttog!

Ita ket ti aramid a pangep-ep
iti bisin, ti panangdengngep
iti rusok iti debote a darang
nga iti barangabang dagiti unget
ket ti main-inaw a dangadang!

Iridis ti bote iti rusok
sa ikombiene ti pananglipit
amin a dagensen ti din magadullit
a pannakapnek.


Febrero 18, 2012
Honolulu, HI

Aredak

Umuna nga arbis, kas bayakabak.
Inauna amin a panangbisibis
Barat’ barukong ti ili nga iti naliday a kannag
Ket maminribu a mapasag
Santo kadagiti unget, iti pammati
Kas iti panagayat, ket ti panagungar
Nga iti lisay ket ti soltero a tig-ab.
Daytoy ket iti ili: aredak kadagiti
Di manumeruan a kalgaw
Wenno panagbisin. Wenno panaggawat
Tapno kadagiti inurit ket ti namnama
Nga iti rubuat dagiti mula a maitukit
Ket ti manigsiguro a panaganani iti ragsak.
Siglo dagiti tawen, kas ti lamiis
Daytoy umuna a tudo kadagiti rebelde a sellang
Tapno ditoy, kadagiti alikuno ti danum-langit
Ket ti selula ti revolusion nga iti riwriw
A panagidaton iti agmatuon
Ket ti riwriw met a panagaklon.

Febrero 16, 2012/
Honolulu

Selda Onse

MANILA, Philippines — The presidential suite of the Veterans Memorial Medical Center (VMMC) in Quezon City is ready for occupancy, hospital Medical Director Nona Legaspi said Friday. C. Yu. Radio Inquirer, Dec. 2, 2011


Agur-uray ti kuadrado nga espasio
Ti pawaywaymi kenka nga aldaw.
Basol man wenno saan ti nagan ti darikmat
A kadakam ket impaidam, itan ket
Bukodam dagiti uppat a suli dagiti balikas
A kadakam ket minemmem, rinabsut
Kadagiti bibig dagiti ubbing ti lamlammiong
Tapno kadagiti bilog ti tagainep
Ket ti arinebneb
A demokrasia ti mannanakaw.

Adu a kari.

Adu a pammatalged ti matay.

Adu a patibong ti aglusdoy
Tapno iti krimen kadagiti mannibrong nga isem
Ket ti sabidong a sagut ti mapaay.

Tinagikukuam amin a matagikua:
Tapok, tirania, dagiti arestado nga anges.

Kukuam amin a matagikua:
Lupot iti bagi nga ulbod, kas ti kararag
Kadagiti tumeng a nakasursuro
Nga agparintuod, ket iti ginget dagiti isusuko
Ket ti deklarasion a ti ili ket balud
Dagiti benditado nga am-amangaw
Dagiti obispo, padi, pulis, pulitiko
Ken ti kansion ti koro a mabayadan.

Madagdagullit ti pammakawanmi kenka.
Ngem dimo pinakawan dagiti pammigatmi.

Madagdagullit ti pammakawanmi kenka.
Ngem dimo pinakawan dagiti pangngaldawmi.

Madagdagullit ti pammakawanmi kenka.
Ngem dimo pinakawan dagiti pangrabiimi.

Ta sika, kas idi punganay, sika ti pagapuan
Dagiti amin a tig-ab nga iti karabukob
Ket di met makalasat. Agbugsot dagitoy kas
Kadagiti amin a pammaidam
Kas kadagiti maudi a rayray ti mangrabrabii a bituen
A tinagikuam, impempen kadagiti baul
Tapno kadagiti sardam ti utangem a sipnget
Ket bilangbilangem kas pakaragsakam.

Idinto a dakami, iti sulinek dagiti tagainepmi
Ket ti namnama iti kakaisuna a makan nga itan
Ket sinandiam iti kararag, pammati, allilaw.

Kadagiti uppat a suli ti panawen, dita
A riknaem ti panagbisim, iti balikas
Kas iti diminto ited a wayawayam.

Kadagiti rabii ti panagmaymaysa,
Padasem ti makidanggay kadagiti agpuypuyat
A kanito tapno ti anghel a kasisigud
Ket dinaka inggaan, kas iti aliwit matallikudam
A masakbayan.


Dis 1, 2011
Hon, HI

Panagpaburek iti Dara

Kastoy ti panagpaburek iti dara:
agaludoyka nga umisem
tapno amin a saiddek
ket iti ungot
nga ipaitalimeng.

Sadiay, iti lukong daytoy,
sadiay a bilangen amin
a saiddek, kada balikas,
kada aweng nga iti panawen
ket ti babawi ti panangirurumen.

Kas koma ita nga aldaw:
iti Golden Coin, iti daytoy
nga oras ti panagsasarak,
isuda iti falso ti am-amangaw,
sika iti karit ti imbag.

Ngem agburek ta agburek
ti dara nga iti adu a tawen
ket inkan pinabpaburekan.

Aron dagiti sao, kas ti aluten
nga iti kada sungrod ket ti alipaga
ti pananglimlimo, isuda
iti basbas ti privado nga ulbod,
sika iti namnama ti pudno.

Ket ita a panagsasarak
ket ti rubrob ti dalikan,

isuda iti madagdagullit
a panamagsisilpoda iti riro,

sika iti kakaisuna a pauyo
nga iti ulimek ti sulinek ket kadua
iti ngatangata ti pannakairubo.

Sumrekka iti bangketa ita a malem
tapno iwarasmo dagiti kaasim
kadagiti mababain nga isem,
sika iti balligi ti apuy,
isuda iti keltay ti kayo
nga iti alipaga ket manursuron.


Waipahu, HI
Septiembre 4, 2011

Panagur-uray

Elderly woman dies while waiting in line to watch TV show-Philippine Daily Inquirer, 12-24-10

Alejandra Santos, 72.

Willing Willie, iti Channel 5.

13 nga oras a panagur-uray.

Ramen dagitoy ti gasat nga iti oras

ti milagro ket ti kinadaksanggasat.

Gasat a limlimo kadagiti kanito

ti dagaang iti ili ti santilmo a

mangiyaw-awan.

Kimkiman ti maregmeg

kadagiti iking ti latok ngem ta, iti panagkamtud,

ket ti panaglusdoy dagiti ar-araraw

a masirpatka uray iti apagdarikmat.

Sika ti mangikari iti nam-ay, talinaay,

kappia, abunaw, dur-as

kadagiti adu a panagparintumeng.

Bituen dagiti pannakapaay,

bituen dagiti tarumpingay nga iti telon

ti rigrigat ket sika, sika,

o dios a babassit ti entablado,

ket sika ti mangdegdeg adu pay

a panagur-uray. Ken panagsaraaw.

Matay ti mabisinan a bagi,

iti panagur-uray a masirayanka,

kas ti agkurkuranges nga ili

nga iti iskrin ket maiwarwaragawag

umuna a panangngaasi.

Ta kasta ti biagmi ditoy:

adda maganab a nagabay

a bendision kadagiti sipsipat nga addaan

gatad, lima gasut iti maminsan,

sa riwriw iti kapamindua.

Adda basbas kadagiti agkiraykiray

a silaw ti panagarrap, iti man pannakangngeg

ti kari a nasayaat, iti panaglayus

ti lua kadagiti agrekrekkang a bengkag.

Siak ni Alejandra Santos, ti agbuya

kadagitoy a daeg ti panangallilaw,

ti umuna a premio iti maudi a pangngaldaw

tapno iti ipupusay ket ti pannakapaay.

Dis 10/10

Marikina

TI UMUNA A TUDO ITI MAYO ITI MARIKINA

Dimtengka kadagiti nabara nga oras

Iti maar-arakattot a sardam, sa iti agnerbios

A bannawag iti ili a nagkamangan,

Adayo kadagiti amin a dangadang

Iti lagip a naggapuan, kas iti panagtalappuagaw

Ti nakisang itan a danum ti Padsan.

Adu a pakasaritaan: ti daniwmo iti presidente

Nga iti panagtabon ti kararuana ket piman

Ta maitantantan kadagiti arimukamok,

Kadagiti bisibis ti tudo nga iti angrag

Ti tiempo ket ti maidagel a panagkulay-ong.

Kadagiti talon a masaripatpatan dagitoy

Kalpasan ti panagpadara ti nakem

Iti madagdagullit a kompesar ti kalgaw

Iti agur-uray a kanalbuong ti gurruod

Wenno ti anak-ti-sal-it, agkimat tapno

Iti apagapaman ket ti daga nga iti agmatuon

Ket ti pammadso ti nabaybay-an a gimong.

Saan nga ili ti adda kadatayo ita.

Saan a pagilian nga iti kansion ket ditoy

A maarikap ti sonata ti linteg nga iti sirmata

Ket adda kadagiti maidasar nga un-unnoy

Ti konsierto dagiti dadaulo nga agmauyong.

Liriko amin dagitoy ti gasat a ditay inay-ayat.

Liriko dagiti dayyeng nga iti agsapa

Ket ti pait dagiti bigat nga iti komedor

Ket ditoy a mabalasa ti numero a naimbag.

Kas iti loteria dagiti tagainep, kas iti pinnusoy

Tapno kadagiti papaayat ti ginnasanggasat

Ket ti agtagitao koma a ragragsak.

Ita ket ti umuna a tudo iti arununos ti kalgaw

A panagawid ti mannaniw manipud

Panagtalawataw kadagiti antigo a sursurat.

Inkur-it dagitoy kadagiti pakasaritaan

Nga iti kannag a bulan ket ti isasangbay

Ti umuna unay a pammakawan.

Itapaya ti mannaniw ti nakaungap a dakulap

Tapno iti appupo ti mangted bang-ar a danum

Ket ti kari a di pananglipat

Kas iti panaglaing iti tian iti sarsaraaw

Ti adu a pananglanglangan.

(Naisurat, May 10, 2010, Marikina, Filipinas)

Lawag, 1

Que podemos hacer con nuestras bocas

si han puesto dinamita en nuestro dientes?

Ronald Bonilla, 'La Luz Entera'

(Ania pamay-antayo kadagiti bibigtayo

No inikkandat' dinamita iti baet dagiti ngipentayo?)

Kastakami iti ili, iti lawag kadagiti sipnget

Nga iti barukongmi ti akimbagi.

Dimin kukua dagitoy, idi pay,

Sipud ti rugi ti ari a nagkari

Kadagiti tupig nga iti surnadan

Ket ti kararag kadagiti natay

Saan a kadakami a sibibiag

Manipud iti estoria ni Limahong

Agingga iti pannakaustel dagiti kangkong!

Agsublisubli dagiti sumilasu

Ti kakaen, ti isu met laeng a balikas

Ti nasudi koma a gagem kadagiti bawang,

Nga uray iti agkuriteb nga aldaw

Ket ti kasta unay a banglo ti masisi

Nga inuraga nga ar-arapaapen.

Umay dagiti kumaw kadakami

Iti baet dagiti sagpaminsan a sakmol.

Umay dagiti mannibrong iti panagpidut

Kadagiti maregmeg. Kontraenmi koma

Ti panagbayanggudaw ti ugaw

Ngem ania ngarud ti kapay-an

Dagiti kamarinmo nga iti tagainep

Ket agnagan dagitoy iti ubbaw?

Ket ita, iti kada bigat, ket dagitoy a dinamita

Kadagiti bibig, ngiwat, isip, nakem!

Agtaraykami koma iti katedral dagiti kaasi,

Kararag, pammakawan.

Ngem adda dagiti basol

Kadagiti abaga ti kamino real: sadiay nga agpakita

Ti ari a bangkay iti engkanto ti inna ipapanaw.

Marunaw ti isperma a tao iti raya ti aldaw

Tapno kadagiti dung-aw, sadiay nga agbiag

Manen ken manen, agmattider kadagiti saibbek

Tapno mangiwaragawag iti lawag, bugbugtong

Kas iti kari, nasudi kas iti kari, mangisalakan

Kas iti kari, ket iti sipnget, sadiay, sadiay

Nga agari.

Subliantayo dagiti lagip kadagiti ubbing.

Awan kadakuada ti bannatiran nga agkingkingking.

Iti latok ket ti dinamita a nagdaliasat

Manipud kadagiti angin, sa ita adda iti kada subo

Nga iti kinirog nga innapuy ket maibislibislin.

Oktubre 9, 2010

Hon, HI

Agbirbirok ni Ilokano iti Ilina

AGBIRBIROK NI ILOKANO ITI ILINA/

THE ILOKANO IS LOOKING FOR A HOMELAND

Recited at the Narvacan International Banquet, October 8, 2010,

Empress Restaurant, Honolulu, Hawaii

Agbirbirok ni Ilokano iti ilina.

Kadagiti sabangan a maikawa,

Kadagiti pul-oy nga iti rabii ket agpagungga:

Agbirbirok ni Ilokano iti ilina,

Kas idi punangay dagiti sariugma

Agbirbirok ni Ilokano iti ilina:

Iti sampaga dagiti sabong ditoy,

Ti mabibi a panagukrad dagiti petalo,

Ti masmasnaayan nga ayat

Ti ungkay ti agngangabit a karayo

Kadagiti busel ti rosal, rosas, kayanga

Ken iti daytoy a kadaratan nga iti apagapaman

Ket awanda: awan ti wayawaya

Awan ti gulib nga iti agsipnget

Ket sumiruksirok kadagiti maturog

A barsanga tapno iti ridep, sadiay,

Agadda sadiay ti panagpasag

Nga iti tingrag ket ti agungar a pakada.

The Ilokano is in search of a homeland

He searches and searches and in these islands

As in the islands where he comes from

He looks at every nook and cranny

There in the corner of fear and acres and acres

Of misery, he looks and looks around

And surprise meets him on the streets,

Mean and demeaning,

And in the hills are the stories that are not his,

This Ilokano who have come,

This Ilokano in search of a land

This Ilokano in searc of a homeland.

Once he had the ili.

And in the generations,

Iti genesis dagiti adu a rugi,

Iti pagapuan dagiti adu a punganay

Nga iti palad ket ti tarumpingay,

Agbirbirok ni Ilokano iti ilina.

Ditoy, ditoy, over here in Hawaii,

He has yet to find that: find the history

He can come home too, his life in the fields

Buried deep in words whose meanings

He does not know.

Show me your hands, kunada.

Kitaenta ti paladmo, they say.

And there, in the calluses are the fears

And there, in the burned skin are the dreams

He buries deep in the earth, this brown earth

This read earth, and he comes full circle

In his glorious sadnesses as he traces the blades

Of leaves, the cane he grows, makes tall, erect

Against the golden sun and whistling wind

Agtangkayag dagitoy a mula tapno sumarut

Iti langit, karitenna amin a bendision

Tapno kadagiti madagullit a basbas

Ket ti panagbirok iti agas ti bannog.

Agbirbirok ni Ilokano iti ilina.

Kadagiti ili a dina kukua.

Kadagiti pagbabakalan nga idi punganay

Ket isuna: sakbay ti amin, sakbay ti Filipinas,

Ket ti nasionna, ti purok iti puso a puso

Ti nagkauna a padaya a sadiay,

Kadagiti aweng ti duogan a gimbal

Ket ti daldallot kadagiti duayya.

Ditoy ita, over here, in this land,

Are the strangers that we are coming

To roost in the spaces that we are:

Agbirbirok ni Ilokano iti Ilina

Kadagiti baet dagiti leddaang ti iyaadayo

Kadagiti agpang dagiti agpakada a karayo

Agbirbirok ni Ilokano iti ilina.

The Ilokano is looking for a homeland

In this strange country of our ancient loves,

Strange as strange can be, estranghero

Kas kadagiti dalluyon, natalna kas met

A natakneng, nga iti danum ti baybay

Ket ti ararawtayo iti agmalem

Tapno dagiti kalio kadagiti ramay

Dagiti dara kadagiti ribo a panagibtur

Ket ti salakan nga iti maudi nga aldaw

Ket ti pannakasubbot a maur-or.

Paspasmok

Panawen ita dagiti tudo

oras ken kanito a kadagiti aldaw

ket ti kari ti paragpagan a paraiso.

Saan a kas iti langit

ti adda kadakami ita:

dagiti lutlok ket kadagiti dapanmi

kalpasan daytoy a delubio

kadagiti agdan paraangan arubayan

duag ken laem ti balay

ti kakaisuna a puon ti sennaay

ita nga Septiembre

dagiti tudo nga agbatas militar

tapno kadagiti diktaduria iti puersa

dagiti amin ket ti agkanalbuong

nga igam a pangbutbuteng

kasingin ti sagawisiw:

saan nga aguni daytoy

tapno pasardenganna koma

dagiti gabat manipud iti agpagungga

a layus ti kinabulbulitor

kas iti dawel ti apres nga iti barukong

ket ditoy nga italimeng

ti sangatukel a bendision

ti in-inabo dagiti balikas

a barayuboy:

kas iti paspasmo a numero daytoy

kadagiti agkakambor a gasat

iti laksid dagiti layus ken aminen

a rigat ti panagtalakias

iti man ili a makaammo ti petsa

ti umuna a panagayat

Panawen dagiti tudo ita:

kas iti agbusi a ngiwat

ti babai a kurdapia

nga iti palasio dagiti amin a ragsak

ket ti agulimek a rikna ti daksanggasat.

A. Solver Agcaoili

Manoa/Oct 4/09

Darepdep ti Danum

Agdarepdep ti danum

agsarimadeng daytoy a kas

iti panagallintok ti ubing

santo mangapiras iti angin

ket iti siudad dagiti pinanawan

a panagngilan nagkaadu

nga ipapanaw ken panagsubli

agragut daytoy a makabulos

iti sappuyot ti kali

aripit waig aminen a pagayusan

dagiti likido nga ayat

tapno iti rungsot ti bagio

ken ti alumanay ti kappia

iti dakulap ket ti alimpatok

ti rugso nga awan labas.

Agdarepdep ti danum:

bangkay dagiti malmes

a beggang iti sellang

kas iti atong ti maimassayag

a kinaawan, kawaw kas iti ulo

dagiti mannaniw nga agam-amangaw

kasta met laeng dagiti Ondoy

a no dumteng ket buribor

ti ulo, buong dagiti amin a barukong

ta agibati iti pitak

iti dakulap ti aginmamaton.

Kastoy iti Marikina

dagiti amin a siudad ti didigra

nga uray iti adayo ket ti naasideg

a rikna kadagiti napaksuyan a ngatangata.

A. Solver Agcaoili

Manoa/Oct 4, 2009

Panagtayab ti Panawen

Panagtayab ti Panawen

Tempus fugit. Sic transit gloria mundi! Time flies. Thus passes worldly glory! Agtayab ti panawen. Kasta ti nainlubongan a dayaw!

1

Maysaak nga estranghero

iti daytoy maudi a pannakaidasay.

Agosto Uno iti daytoy

Nga isisina kadagiti amin

A nalabaga nga unget

Ken de-rosas nga ayat,

Naisangrat iti ili nga ing-ingungoten

Kas met iti bukod a bagi

Iti bukod a panungpalan

Dagiti agtalapuagaw a kanito.

Iti pantok dagiti bantay iti Sante Fe

Ket ti pakaammo ti kasimpungalan

Dagiti bukod a darepdep, agkabannuag

Daytoy a balikas ti main-inaw

A panagipapas tapno iti bersikulo

Dagiti panagdaliasat ket maiyebkas

Panagibales kadagiti amin a kinadakes

Dagiti mersenario nga oras

Kinadakesda kadagiti umili a kas kaniak.

Simminan ti babai nga amarilio, impatayab

Ti kasimpungalan dagiti amin a revolusion

Iti text, mensahe a para iti pantok

Dagiti nagkaadu nga aramid iti kinalinteg

Wenno ti kaing-ingas daytoy

Kas iti anniniwan dagiti pimmusay

Nga anniniwan iti di makaidna nga agpatnag

Agur-uray iti pammadso dagiti nakalkaldaang

A pasamak: matay tapno agbiag

Dagiti ar-araraw a kadagiti kalkalsada

Ket panagdadagsen daytoy

Iti matris dagiti amin a ranggas

Dagiti diktador, dagiti soldado dagiti diktador

Isuda a nagkukumplot tapno kadagiti allawig

Ket ti mata ti dalluyon nga iti patag agsaknap

Mangikipas kadagiti rugi dagiti sarita

Tapno iti gibus dagiti gartem ket ti kasaba:

Baro a gimong para iti amin

A mayat a mamati iti bubussog

Wenno paparaw wenno panaas ti sellang

Iti ili a nakaiyanakan dagiti gulib

Iti komedor kas iti bukot

Kadagiti oras ti pannangan

Kadagiti oras ti iriridep nga al-alawem

Dagiti amin nga imahen ti kinaasinno

Dagiti kari ti demokrasia a sapata ti inana

Wenno ti pangiyiladan iti kettang

Iti agmalem a panagpasanaang

Kadagiti tumeng kas iti bukot

Iti agmalem a panagimurit kadagiti numero

A nainap.

Sumangkautro met dagitoy a kigaw a gasat

Sumangkautro met dagitoy nga appan

Para iti koma nalabon a panaglalanglang

A saan ket laeng a dagiti annak ti pangulo

Ti agkuna nga adda karbenganda

Nga agbirkog kadagiti saemtayo

Tapno aramidenda dagitoy a milagro

Iti panagabalbalayda kadagiti dunortayo

Tapno manipud kadagiti nana, kas kadagiti dara

Nga agsayasay manipud iti maabaaban nga utek

Ket dagiti pirak ti ili a kadagiti sabali nga ili

Ket igatangda kadagiti paraiso.

Pagtaengan a minimilion manipud kadagiti kalio

Bilok, telkak, ling-et, anangsabtayo

Pagtaengan a dagiti laeng nawaya a panagabuso

Ti agindeg tapno iti kursada dagiti riknatayo

Ket ti panagulimek, maulit-ulit a panagulimek.

Ta kastatayo met ngamin, kas idi

Kasta met ita awan inggana.

Para buyatayo kadagiti amin a komedia

Ti linnanggongan: daanam, daanam

Ti biagmo a maiwalang

No ti ngiwatmo ket dimo kaluban!

Anian!

Aminen a pagsayaatan dagiti adda iti poder

Kas iti appo ti bariwengweng

Ti presidente dagiti kararagtayo

Ti presidente dagiti amin a panagparintemengtayo

Ti presidente dagiti amin a panagdawattayo iti kaasi

Kadagiti amin a sasanto, iti man Piat

Wenno iti Nangisit a Kristo:

Amin, amin dagitoy ket nagtamedanan

Iti panagdawat ti lawag kadagiti pimpiman.

Ngem, a, ta, makaammo ti tao a kuneng

Makaammo ti panagdanum ti tumeng

Panagkutukot daytoy saan a gapu iti buteng

No ti aliaw manipud iti bisin

Iti bunggaria dagiti sagrapen

A kadagiti sulinek ket mangilin

Tapno iti nagan ti kiraos ket ti pannubbot

Kadagiti amin a pannusa nga il-iliwen

Pangkissay kadagiti babantot iti barukong

Kas iti abaga tapno kadagiti rugi ti darepdep

Ket ti paripirip dagiti pinggan a manglanglangit.

2

Ti Ina dagiti Tagainep a Kiaw, ti kayatna

A sawen, isuna a kadagiti aldaw ti panagmusiig

Ket ti pannakaibangon ti lasag ti ili

Manipud kadagiti agrakaya a panggep

Ti diktador kas iti asawana a balitungeg

A no agsangit ket agdara ti matana a suitik

Nga agipangres kadagiti amin a ladingit

Para kadagiti ubbing a parparagsit

Isuda nga awanan iti masakbayan

Isuda a kadagiti walang ken daldalan

Ket ti maamitan a pannakaiyaw-awan.

Awagan no kua ti nagan

Tapno agsublit’ naggapuan

Ti awag kadagiti umuna nga oras a mabigatan

A nagpakada kadatayo amin a pinimpiman.

3

Dagiti amin a damag a kayatko a mammuan

Uray kadagiti baet dagiti nagkaadu a panaglagaw

Itan ta maitabon maysa manen nga am-amangaw.

A Solver Agcaoili

Hon, HI/Sept 2/09