Iti kristal a katedral daytoy
a buya: maysa a lalaki
ti agbirbirok iti panagungar
iti sakaanan ti dios a natay.
Maysa nga akto ti tularamid
ti sumuno nga eksena
iti aldaw nga agpampannimid
a dagiti oras ket agresesion
iti panamati iti paspasagid.
"Daytoy ti lisensia," kunana
sa iti isem ti malmalday
ti kabulon ti ima a mangiyawat
iti nagan iti tinta nga ukasen
ti pannakatay.
"Daytoy pay ti maipapan
iti lugan iti garahe
a no di umay ti umarayat nga ayat
ket sadiay nga ilugan ti bangkay
dagiti tagainepko a maidasay
kakibin ti bagi nga agrupsa
kadagiti ar-araraw."
Saanna a kuna ti maikadua
no di ket panggutad daytoy
kadagiti linabag tapno maikuadro
ti rukapi a biag.
Mapan ti lalaki iti altar
ket iti sakaanan ti nakalansa
sadiay nga alawenna ti panagbalaw:
sadinno a langit sadinno nga impierno
sadinno a kalbario sadinno a purgatorio
sadinno ti pakaikipasan ti pammadso
no ti panagmurir ket adda iti ulo
dagiti sulpeng a rebulto?
Kas kenkuana, di agkir-in
ti kristal a katedral, nakamattider daytoy
iti agpampannakkel nga aldaw
dagiti panagruruting dagiti lumot
kadagiti di-agbara a dapan ti dios.
Gibusen ti lalaki ti kanito
iti panaburak iti ulimek
iti kristal a balay ti di matay a dios:
ti ngudo ti paltog
iti sentido a balay ti barukong
a kasinsin ti abungot
wenno manto dagiti pasugnod.
A Solver Agcaoili
Hon, HI/Feb 18/09
