Singkuentaisiete kas iti anges
a kadagiti buli ket mailuges
magamer iti pitak darat
pannakalipat
maitantan kas iti saibbek
tapno kadagiti putan ti kalibre
a kadagiti buteng ket maiparit
ket ti pannakaidulin ti sangit.
Iti narukop a tapok kas iti biag
nga inungaw ledledda
ti rikna nga iti walang
ket iti ranggas nga agpaarayat
ket ti agultimo a sakuntip
a kadagiti sangi ti aldaw
ket ti panagibales ni ayat.
Todas iti todas
iti gatilio nga iti eksena
ti singkuentaisiete a pannakapadso
gumawgawawa agbirbirok
iti kamalala dagiti pimpiman
nga iti malmalday nga aldaw
ket ti makikkiki a sapata
dagiti puraw a lungon,
maibaratilio a maintar-intar
dagitoy kadagiti suli ti agdandanag
a mata tapno iti imahe a mabukel
iti mawaw a panunot ti anghel
ti didigra iti Ampatuan
ket ti ngudo ti paltog
kadagiti ngiwat barukong ulo
kilikili sellang batillog buto
kinatao nga adda kadagiti puerta
kinababai nga adda iti matris
nga iti panagbettak ti bala
ket ti bassit a dios nga agpagungga.
Kas kadagiti mannurat nga iti labes
dagiti lohika ket ti tadem ti balikas
kadagiti ikamadada a linia,
kampania iti panagperdi
tapno iti kinatao ket iti rekkang
ti rabii, sadiay, sadiay a mailbut
tapno iti barangabang ni estranghero
a sirmata ket ti embalsamado
a parparmata kadagiti ansisit a babassit
a barrairong wenno barrairong a higante
ti makaaliaw a panagderrep ti agsaksakidol
a kinaulpit dagiti daga tanem rabii
ket ti mabigatan a panagbabawi.
A Solver Agcaoili
Manoa/Dec 9, 2009
No comments:
Post a Comment