Trenta

Maysamaysan a maitabon dagiti 30 nga agiwarwarnak a natay iti Maguindanao. Manipud kadagiti damdamag, Dis. 4, 2009

Daytoy ti bilang ti maaramid

a matansa: panagdawat iti gundaway

nga agisem tapno ti mannurat

maikur-itna ti wayawaya.

Ngem iti Ampatuan,

tuok dagitoy,

kas iti panangkali

iti abut a ditoy

nga idulin ti paragrafo

ti panagpauyo.

Anansata iti inaldaw-

aldaw a panagkalio

dagiti tutubbogan ti lua

ket ti panagsebba met

dagiti aglammin a katawa.

Awanen kadagitoy a sulsulinek

dagiti nawada a langit

a ditoy ket ti panagapit

iti kari a kadagiti higante

a parparipirip dagitoy ket babassit-usit.

Panakpak ti rifle ketdi

ti sungbat kadagiti sainnek

ket iti gibus ti pakauna

ket maudi nga ibit

ket ti panangaradas

kakaisuna a ladingit:

awanen ditoy Maguindanao

ti kaibatogan ti kaes-eskan

uray kadagiti tanem

a kadagiti nabungsot a lasag

isaruana itan.

Agsansanuong

ti sentido kadagitoy a buya:

ti ama iti anak ket ti pammakada

ti anak nga iti ama ket ti tabugga

ti ina nga iti imet-imet a biag

ket ti arakup ti daga

nga iti maysa laeng nga arbis

ket ti panagrupsa:

ti bagi kas iti tagainep iti kappia

ngem anansata trentakami

dakami a ginudas dagiti partidor

kadagiti balikas a makaagas

a kadagiti sugat mangted iti piglat

tapno saanton a sumuko iti ngudo

ti paltog, saanton nga agkumbawa

iti babantot ti paspasablog.

Ditoy nga ilimi ket mapan amin:

ti dusa kas iti nasarangsang

nga angin nga iti karuruotan

ket ti pammadso a mailemmeng.

Tallupulokami amin

a sumuko ken Apo Daga

tapno iti pakasaritaan ti ili

ket ti agungarto koma a kasaba.

Itan ket ti pammunpon

kadagiti amin a pamutbuteng

tapno iti puso ket ditoy nga arikapen

ti agrutruting a baro a pakinakem.

A Solver Agcaoili

Manoa/HI Dis 4, 2009