Talappuagaw

Itan ket sika ti talappuagaw,
Ti pinaksiat ti buteng nga idi
Ket iti bileg sadiay nga intalimeng.

Mano a basol, senador, heneral
Kapital dagiti amin a retorika ti panagugas
Kadagiti ima tapno laeng maawan kenka

Daytoy a pammabasol a kuna dagiti bangkay
Ket sika ti nangukkon kadagti kararuada
Manipud iti asuk, puor, sa ti kaudian nga iriag

Ti biag a maiwalang kadagiti naulimek a rabii?
Adu a panagannad idi ti adda kadakami.
Adu dagiti aramid a dakes a kenka naiyadayo

Ta ngarud sika ti anghel dagiti agbambantay
Iti mariribukan nga ili, malmalday gapu iti leddaang
Mismo a kadakami ket impatawid sa insagut

Tapno sika ti baro a mangikari ken mangipakat
Iti asintada ti paltog nga iti sikigan ket saksi.
Anian ta nakuspag ti turay nga adda kenka.

Anian ta dimo inkankano dagiti pagpakaasi
Ketdi tulengka kadagiti panagulimekmi
Tapno iti natibong a panagpalakpak

Dagiti mamati ket ti ambision iti palad
Nga iti masakbayan ket sika ti ari.
Ngem itan maysakan a talappuagaw

Kas kadakami nga agbirbirok iti kaipapanan
Ngem saankami a nagtakaw, saankami a nagpapatay
Awan kadakami dagiti dara nga iti panagpusitsit

Iti dunor ti pumusay ket iti rupa ti aldaw
A maibudi. Saankami a kas kenka, kunaenmi:
Kenka nga intedmit' panamati nga ita pagbabawianmi.

Sige, agtalappuagawka pay, heneral a senador.
Kadagiti kursada ti buteng ken lamlamiongmo kadakami
Sadiay a birokem ti kinapudno bitbitla a panggargari.

Ita, birokem ti poder kadagiti impotente a lansangan.
Birokem pammatalged kadagiti biag a binusatam
Tapno iti pammadso ket sadiay a dikan makullaapan.


Hon, HI