Kagun

Sabali nga ulimek daytoy.
Adda kadagiti sulinek
Dagiti kuadrado a balikas
Ti babai a mangiyaw-awan.
Isuna ti pader, ken ti sabali,
Babai kas lalaki dagiti sao
Nga iti silo ket pangal
Tapno iti panagtalappuagaw
Ket ti galut kadagiti ramay
Dila, saka, santo ti puso.

Kadakami a saksi kadagiti
Adu a patibong, kas iti silo
Nga iti warnakan ti puli
Ket matuontuon, adda bendision
Dagiti ulimek a nabunniagan
Iti takrot, panurdurog, lamlammiong:
Sika iti teltelko, siak iti teltelmo
Tapno iti awan patingga a kinnudkod
Ket ti awanan ressat met a
Panag-urisay baboy:
Urisay, baboy, urisay, baboy
Iti kakaisuna a ringgor
Dagiti mayat a maturturtor.

Madunggiaran dagiti rabii
Kas ti sipnget nga iti sennek
Ket ti oras nga agbalinsuek
Tapno ti kannag ket iti patibong
Ti babai nga agrennek.

Urisay, baboy,
Urisay, baboy:

Kagun daytoy
Ti daniw ni Ilokano a maibarbarayuboy.


Tacloban City/
Julio 14