Pimmusay a Daga

If I do not return, tell stories about me.--The Dead Lands (a film)


Pumusay met ti daga ket maitabon
Met laeng iti daga. Kas met laeng iti ballailo
A manglimlimo sagpaminsan,

Kas iti narasay a tudo iti agpatnag
A dagaang, Abril man wenno iti rabii
A dagiti adu unay a panagur-uray

Ket agkaltaang, mainanaw ti daga,
Maipusing, sa agkabannuag
Santo iti kangitingitan dagiti panagarog

Dagiti palabra a mangiyaw-awan
Ket agsanselmo a kas iti nuang
Nga agipugso iti apuy iti sardam.

Iti adayo a daga a naggapuan
Pumusay ta pumusay ti daga sadiay.
Agkasuoban, kas pangbugiaw

Mangmangkik a nagindeg kadagiti muyog
Sa iti lagip kadagiti bangkag ken layus
Iti mail-ila a dammang, ngem awan

Ta awan mapagket kadagiti kararag,
Iti man agmatuon wenno iti bigbigat.
Mangala sagpaminsan iti bulong

Ti bakbaka sa kitan iti iking ti linnaaw.
Iti dekolor a lubong daytoy ket
Ti nagkaadu a kari iti ili

Ngem ti umili mabata nga agam-amangaw.
Saanen a justo ti kunada dagiti sinampadi.
Awanen libreta a nangisit a pangalaan

Iti orasion ti amami. Tagalog itan ti panagkusit
Kas iti panagtagalog dagiti amin a mangmangkik.
Namak pay nga Ilokano datao a ngem

Matiritir ti dila iti kastoy a panagkusit.


WKL/
4 Okt 2014

No comments: