A little boy selling pandesal fell victim to a snatcher in Deparo, Caloocan City. According to Facebook user Christopher Pacheco, P200 was stolen by an unidentified man who bolted instantly from the scene. GMA News, 10 Oct 2014.
Ania ti naganmo, barok? Iti Facebook,
Am-ammodaka iti panagibit,
Lamentasion ti nakakaasi a kapay-an.
Kuna ti damag: adda kano agnagan iti gulib,
Sinalamangkana dagiti pandesal,
Inikkan iti virtud dagiti matam
Sa iti abracadabra dagiti mannipdut nga isip
Ket ti laing dagiti ima a mangiyaw-awan.
Kuna ti sabali, wenno adu pay
Nga adda kenka kano ti panaginkukuna,
Daytay buteng nga ibakal kadagiti kalsada
Tapno sadiay ket sumurot kadagiti amin nga agpakada
A pannakaidasay dagiti tapok, rugit, saning-i,
Amin a panaggulib ti ili kadagiti amin a mayat
Nga umanges pay maminsan.
Kas kenka.
Kas iti ina a nangibaon kano kenka tapno iti nasapa
A bigat ket sarakusokem dagiti amin a panggep
Ket iti tugaw iti bansada dagiti tagainep
Ket ti mailako a pandesal
A no ad-adu ket ti isem ti naganak.
Mabutengka kano kadagiti bugtak
Ken kuddot ken unget ti ina nga iti sappupo
Ket nanginaw kenka a kas senador
Wenno diputado dagiti kinalinteg
Iti man balikas wenno iti aramid, kas iti di panangibaon
Kadagiti kas kenka tapno maturog laeng, agdarepdep
Kadagiti ubing nga oras, agtainep kadagiti namaris
A sabong ni ayat nga agindeg iti taeng
Kadagiti siled, salas, idda, ken panganan?
Duagasut a pisos a kinadaksanggasat.
Duagasut a pisos a kalanglanga ti mano a kammet,
Mano a taog iti pagbabagasan a ti birngas
Daytoy ket kankanayon a manglanglangan.
Ngarud, barok a baro ti ili: inka iyibit amin
A sakit ti nakem. Ipangres amin a bilok,
Amin a gura, amin a buteng, amin a babawi,
Iti man bukod a bagi wenno iti pannakipagili.
Dimo ita maawatan ti darnas dagitoy a lua.
Ngem addanto aldaw a saludsodem
No ti nagtakaw ket karuprupa dagiti dadaulo
A no agnganga ket kaing-ingaw ti law-ang
A langit dagiti di makaammo iti pammakawan.
HON/Oct 2014
No comments:
Post a Comment