Alerto

No todos dormian en la noche de nuestros abuelos--
adda dagiti naynay a siririing iti rabii dagiti amma ken innatayo.

1.
Saantay a nakikadua
iti dudungsa wenno simmurot
iti awis ti panangbaybay-a
iti ili. Dagiti allawig
ket nagindegda
kadagiti duag dagiti taengtayo.
Liktadenda pay ti agpipiapi
koma nga agdan tapno makontra
ti awanan-regget a panagpadanon
ket iti pataguab a mabigatan
dagiti namnama ti dulang ti ili
wenno daytay man punsion
a makiwar dagiti siliasi
mapunno ti laem iti gargarakgak
dagiti agbarabaran iti piditpidit
ket ti pasamano tagikukuaen
ti ariwawa dagiti mapnek
iti baak a basi, masukmon
a kas iti panagul-uli
mayawat iti abalayan dagiti umuna a rabii
a ti puso ket maibalud iti sabali pay a puso
ket iti panaganikki dagiti anit-it
ti umuna nga agpatnag ti matrimonia
dagiti lasag ken lasag
agkumpas ti alimpatok
agbilang kadagiti anges
iti pagan-anay ti bain
nga itan ket agnagan iti panagpabus-oy,
panangited iti kinalamolamo
ti rikna nga agduyos iti sabali pay
ti milagro iti gitebgiteb ti barukong
ti kellaat kadagiti katawa
kabayatan ti panagmaymaysa.

2.
Ket kadagiti balitang wenno papag
iti sirok ti mangga iti agmalmalanga
nga arubayan, sadiay nga agurok
ti bangungot, agalimbasagen
a mangriing kadagiti turog
a turog a pungan wenno pus-ong
wenno takiag
wenno dagiti agumbi a bibig
kas iti panagumbi ti makipagili
iti kinalinteg dagiti rusok
a kakaen ti naunday unayen a bisin
wenno pananglangan kadagiti grasia
ti ugaw, ti anting-anting
a paulo dagiti amin nga atang
iti puli a naggapuan
kadagiti pangamaen a tinenneb ti derrep
kadagiti panginaen a pinartuat ti duayya
kadagiti annak a pinagsisipungtuan
ni managsapsapa a karayo.

3.
Saan, saantayo a paabak
iti balligi ti dudungsa.
Kaduaentay ti naunday a rabii
a mangpasangbay iti nagabay
nga oras ti innala ken ayat.


A Solver Agcaoili
En 16/06
UH Manoa

4 comments:

Ka Iddo said...

panagridam, wen, kas kadagiti sangapulo a babbalasang a nakaiggem iti pagsaingan ken mangur-uray iti idadateng ti nobio; saantayo a mangan iti puni ken makikiwar iti siliasi ti sinan-umbi;saantayo met nga lumidok kadagiti immab-abanda ken makidilamot kadagiti naglanglanganda; lumabastayo laeng, wen, ken umisem ken ibagatayo a saan a panagbain ti paay nga awis no di ket panagpammarang a nabsog tapno maibatitayo dagiti pinilitayo a pinidut; a pakaammuanda nga inton agpatinggan ti tik-abda ammodanto a limmabastayo; wenno ammodanto ket ngatan a linabsantay ida; iti malem, sapulendanto la ketdi ti nayon ti intay imbati kadakuada ken agsapuldanto met iti ad-adu, ngem sapuldanto a sapul didanto makasapul; ta aginana met ti waras a kas iti panaginana ti nagkallautang a bulong iti sab-ok ti angin; adda ti senial ti idadalan, ti ilalabas, ti pinidut nga imbati, a kas kadakuada adda met senial ti kinaasino ti agtagikua kadakuada

yos, no maminsan, makabasatayo kadagiti humanismo, maiyagus met ti utek iti kinasin-aw dagiti balikas ket maay-ayotayo met a bumatokbatok ken aglangoylangoy, hehehe! ala, ket limmabasak laeng, ka ariel….

Ariel said...

goodness, ka jim, you are better than gibran and tagore. and i am not even kidding!

Ka Iddo said...

gibran? ni khalil? (maudi man wenno umuna ti "H" mabalin latta)

"politikoka kadi a mannawat iti aniaman nga ited kenka ti pagiliam wenno maysaka a naridam? no sika diay immuna, alimatekka; no diay maikadua, maysaka nga oasis iti disierto..." -- The Frontier

yos,nakapuyak iti patarus...ni ading roy ti eksperto ta naanus nga agimuri ken agpanunot, hehehe!

Ariel said...

anian@! ilokano and amianan literature is blessed b/c there are people like you. clone yourselves, you and rva. this is the only way for brilliance to get multiplied.