Ulaw ti awagda iti surat,
kas iti husga dagiti baglan
kadagiti impostor a mangngagas
wenno kadagiti mediko ti kararua
kadagiti mangngablon iti nakem
a nasayaat wenno agbirbirok
iti nasamay nga ayat.
Iti ilimi ita ket ti sinnungbat:
ulaw iti ulaw. Mayat a madi,
madi a mayat dagiti maisawang
a regget kadagiti petsa ti kalendario
a saksi kadagiti palangguad
ti balligi a rinarabak. Awan sirmata
kadagiti linabag ti salaysay
a napauluan iti riro
wenno kinakuspag
wenno pasindayag dagiti uni
ti ari ken ti aribai kontra
kadagiti gagangay a kas kaniak,
isuda nga agkakaasmang
a paraiddek iti rugit nga idul-a
ti maar-ariek a bibig ni maikanniwas.
Saan nga agtagilasag ni laing ditoy:
agikay kadagiti mababain nga aripit
iti naalikuteg nga apres a makilinnaing
kadagiti makakiki a bassawang ti rabii a makisinniket
kadagiti makaariek a karayo ti sardam a makiinnangaw
kadagiti makaluya nga umbi ti kaltaang a makialimpatok
makikammaysa kas iti dimmiro a samiweng
ti nargaan a parbangon nga agwalangwalang.
Ulaw ti awagda iti kakaisuna a surat:
saan a mabatok ti riper ti danum
a ti apresna ket iti narugit a lansad.
A Solver Agcaoili
UH Manoa, En 14/06
2 comments:
ka ariel: ulaw a kadagiti addaan iti utek a kawaw; ta kasano koma a makaawat ti mulagat a mangitagtag-ay ken mangitantandudo ti bukodna a mukat? wen, kayattayo a buybuyaen ti matmaturog a karayan, ngem adda met dagiti mangkibor ken agdappuor a di makaapresiar ti arte ti kinaulimek ken pia; ngarud, di ngata nasaysayaat a di tutopan dagiti ubbing a mangiyik-ikkis ti bukodda a laing? wenno nasaysayaat nga intay mangiras ket ibatitayo ti apuy nga inudo dagiti nakapuy? hmmm, no maminsan, nangato unay ti tayab dagiti sallapingaw iti panawen ti kalgaw...hmm...
jim:
anian a balikas! saludaranka: "...intay mangiras ket ibatitatyo ti apuy nga inudo dagiti nakapuy.."
Post a Comment