Kenka, Inauna: Sika ti ungto ti bullalayaw.
Maris ti adda iti balikasmo. Amarilio
Ti pannakidangadang idi un-unana a panawen
A nagibitka, panaginkukuna idi damo.
Idi agbayag, kaduetom dagiti amin nga umili
Nga agsangsangal iti kinalinteg kadagiti killo
A dana, iti biag man wenno iti panagam-amangaw.
Nagbalin a nalabaga dagiti buridek a sao
Nga ininawmo kadagiti martsa, rali—
Ti kudeta ti panagiyebkas iti panagkontra, “Saan!”
Nagbuteng idi ti inam iti pannakasursuro
Nga aggemgem. Sadinno a sulinek ti lubong
Ti nagbasaam tapno maadalmo ti kursada
Dagiti awanan nagan a wayawaya?
Malagipko ita ti sungbatmo iti ungetko—
Miliamilia nga unget iti adayo nga ili a nagkamangan datao—
Daytay panangakusak kenka a barbarayuboyem
Dagiti basbas dagiti anito ken ti ling-etmi.
Kadagiti kadi sagumbika a nagipulong?
Wenno kadagiti kararua dagiti anniwan
A no agidiaya iti panaglak-am
Ket daton met laeng a sabidong?
Kunam: Apay, apay nga adda dangadang
Kadagiti daniwmo?
Maysa nga akusasion met daytoy.
Kaniak, siak nga amam sipud pay dagiti rugi
Dagiti di maungpot-ungpot a kanibusanan.
Agarubos ti luak. Pudno ti gera kadagiti balikas
Ket ita diakon makapaglibas. Ideklarak ti rinnupak.
Sentensia daytoy iti tagainep iti walang.
Nakasursurokan, Inauna. Nakasursurokan nga agbasa
Kadagiti palimed dagiti senias. Iti kaawanko,
Dagiti kalsada ken plakard ti taklin—ken daytay
Agkabannuag a husga kadagiti managidadanes.
Ti allilaw ti pangulo, kas pagarigan.
Ti panagballikog dagiti ayamuon ti karida iti agmatuon.
Ti kusit dagiti panglakayen, panginaen—aminda!
Dimo maiduron, dimo maawid, dumanum ti ima
Uray dagiti saka dagiti sasanto a babassit!
Ayna, amin sa ketdin a markado ti puli. Awan labas,
Kas iti arasaas dagiti busel kadagiti kulibangbang
A managdakdakes. Agtakawda kadagiti nektar
Sadanto ipalladaw iti angin ket datayo a kakaasi,
Kadagiti kararag iti langit tayo nga agtaklin.
Ngarud, duata itan iti daytoy a ginnubal, Inauna.
Sika iti daniw a mangrapa, mangsugat.
Siak iti balikas a mangdunor iti dila.
Iti adayo, kasinginko dagiti salaysaymo.
Agaribai dagiti exilo a rikna ti ama
A mangbasa iti panangikipas a dung-awmo—
Sika nga ubing ti ili. Nakunak itay ti bullalayaw.
Wen ta tinagikukua itan ti kulibangbang.
Maris iti maris—iti panawen ti kappia
Wenno iti panaguksot iti kampilan.
Iti ballasiw-taaw, aguraykami a masindadaan.
Surat iti pader, kas pagarigan. Wenno kadagiti silnag
Ti bulan. Mangtagikua daytoy iti agpang
Ti disso a nakayanakan ken ti purok a nakaipalladawan.
-30-
A Solver Agcaoili
Hon, HI
Ag 2007
No comments:
Post a Comment