Epistolario ti Exilo

Kenka, Ilik: Maipusing dagiti ubing nga allawig iti nakem
Ket iti adayo a daga, sadiay a bilangek ti manglanglangan

A malem. Uray dagiti aldaw, maladawda nga umay
Kadagiti balabala ti daniw. Estranghero ngamin ti sao

A mayabaday kadagiti musa ni laing wenno
Iti ballasiw dagiti taaw ti rikna, agurayak iti awan:

Ti kanito a nairanta iti panagkawili dagiti arsagid a lua.

Mangrugi ti epistolario iti kanito ti panagdudungsa
Wenno iti duogan a panagbisin. Ti rebolusionario a panaguttog.

Ti panagkusit dagiti sagrado a lakasa tapno mainaganan
Ti nagabuyo a pannakapnek, kas iti tig-ab iti sardam,
Mangirakurak iti pannangan dagiti mangmangkik a kaibaan

Santo dagiti ayat a babassit nga agbalin nga ansisit.

Agbirok piman iti gawed ken bua, mamaen a sukal
Ti rusok a manglanglangan tapno ditay agsarua iti dara
Wenno namnama. Linabag ngamin amin dagitoy
Dagiti bubutengtayo iti naglabas a pakasaritaan

Ket taltalanggutangen ti angin nga agsantiguar
Kadagiti malmalanga: iti dayaak nga aguray iti darudar
Sakonto pakanen ti bulan iti bin-ig a nam-ay,

Natimbukel kas iti kilabban wenno kalluto nga innapuy
Sako iwarsi a ti rabii ti saksi iti kasar ti sangaili
Kas kadakami nga agtaltallapuagaw tapno agbirok

Iti dur-as kadagiti terminal ti bus, kadagiti rabii a di maungpot
Kadagiti abenida a kunam la no dalan a mapan
Iti karsel wenno panungpalan wenno naimbag a gasat

A dimo met masierto. Ta ania aya a gapu a pumanawka
No kaatagmo iti panaginana ti malmalanga
Ti panagbilang kadagiti lawwalawwa wenno

Akot-akot wenno kiteb a no maturog ket sibubussog
Idinto a sika, exilo dagiti amin nga exilo, dimo man laeng
Mabilang dagiti saibbek nga idulinmo iti surat
Wenno iti kuaderno iti hiroglapia ti paspasablog.

Dagiti agsisit, agindegda iti darepdep.
Puraw, nangisit, labang, namak pay nga an-anib.

Tapayaen ida dagiti exilo, iti dakulapda,
Kas iti regget iti yaadayo, kas kaniak.

Apagapaman laeng, kunak man idi.

Iti apagbiit, inkarik ken insapatak iti bannawag,
Nakatag-ay ti imak, kas sapata iti pagrebbengan
A masapul a pirmaan, iti man dara wenno iti katay.

Kinunak idi a diak makaidna, kas iti tiritir a tengnged
Ti pumanaw a di met mangibati iti umuna a despedida
Wenno koma gargarakgak, napia laeng a pagraranudan

A panangigibus iti oras iti sardam ti inauna a panaglayag.

Agsublikami, amin kami. Ngem saanen a kas idi.
Ikuyogmi dagiti padas kadagiti gurong a nabannog
Ken ti didigra iti barukong ni babantot.

Exilokami idi, exilokami pay laeng ita,
Iti di agressat a panaguddog ti ila.

--30--

A S Agcaoili
Hon, HI
Ag 07

No comments: