Epistolario Tres

Kenka, maikadua a bunga: yagawam ti agagawa.
Saan a kas karina ti makagteng iti bulan wenno iti pantok
Dagiti turod uray no nalaka laeng a kalay-aten ti bakras.

Agpitpitik ti pulso dagiti danum wenno ti apuy a danum
Wenno ti danum nga apuy kadagiti balikas ti pimmanaw.

Birokenna ti am-amangaw kadagiti suratmo, ngem awan sadiay
Dagiti nasarangsang a katawa ti ubing nga inlillili.
Malagipmo ti panagwarsi no kasta a dika makaturog?

Alaek ti sabsabot. Wenno malukong. Wenno tured.
Karawaek amin dagitoy iti sipnget ket iti sagawisiw
Sadiay nga alawek ti bendision dagiti di katatawan:

“Umadayokayo, apo, umadayokayo!”
“Didakayo kasapulan, apo, umadayokayo!”
“Didakami burburiboren, didakami ringringgoren!”

Sakbayna, alaek ti bagas, igamerko iti asin.
Wenno alaek ti asin, sako igamer iti bagas—
Diak masinunuo ti addang ti panangpapanaw
Kadagiti agkurkurimaong iti ridep a ridepmo.

Alawek ti bagik kadagitoy a bambanag, uray iti adayo.
Ditoy a nakaisadsadak, maysaak a gabat wenno lantsa
Wenno barko—wenno higante nga arapaap ti exilo.

Isagutko, kunak, ti agas ti bannog ken panagur-uray,
Amin, amin, kadagiti annak, ken kadagiti naipusing a ragsak.
Sandi a pimpiman kadagiti panaglangan iti panganan
Wenno iti rabii a ti bukot ket di makudkodan.

Ania ngarud ta adayo met dagiti bituen ken ramay.
Ania ngarud ta masapul a maselebraran ti panagmaymaysa.

Anusam lattan, anusam dagiti anus a no maminsan
Ket agpagunggan, la ket ta di aglapunos ti isip

La ket ta ti agbilang kadagiti okasion ti kinaawan,
Kas iti panagturpos, iti umuna a komunion

Iti panagbelo kas mandato ti madre superiora a kabusor
A siak ti salakanmo kadagitoy a panagukom.

Agisemak iti bangbangir. Isemak ti panagbusi ti ngiwat,
Ti gasang ti dila ket kinunam, iti apagapaman:

“Wen ta diyo met ngamin ammo ti agisuro, sister!”
“Wen ta dagdagullitenyo dagiti estoria, ti leksion!”
“Wen ta nagdalungdongkayo iti nakersang a patadiong!”

Diak ammo no sadinno ti nangalaam kadagiti eksaherado
A sentensia ti kinaubing. Kas iti pidua a panagsuek
Tapno masemento ti braso ken ti panagemmak uray

Iti rabaw ti lamisaan ti siruhano a nagkuna:
“Anian a kinalaing!” Sinungbatak ti duktor:
“Anak ti balasangko dagiti di maipupok a panagsaor!”

Ngamin ta nagubingka iti sibay dagiti tulag,
Sibibiag a kontrata ti ama ken anak.

Inulim naminsan ti atep ti balaytayo ket sadiay,
Iti salinong dagiti asul nga ulep, binirokmo ti maris
Ti manglimlimo a langit. Ideklaram: “Mamatiak, mamatiak

kadagiti ayat a silalagip.” Ala, itedko kenka ti bendision
Ti katay, ti tallo a krus iti muging, iti bibig, iti barukong.

-30-
A Solver Agcaoili
Hon, HI
Ag 2007

No comments: