Epistolario Uno

Kenka, Inada: Pabalonannak iti nasam-it a lua.
Ikabilmo daytoy iti maleta ti pusok. Sadiaykonto
Met laeng a surnadan, kas iti panangisawsawko
Iti tamudok iti agua bendita iti di mabisbisita a simbaan.

Arikapek iti barukongko ti umel a saning-im.

Sangagasutda kadin ita, kas iti pannakaibaratilio
Ti ilita nga ili met laeng dagiti bungata a duadua?

Pumanawka manen, kunam, pumanawka manen
Kas iti rabii, kas iti agpatnag, kas iti tudo iti tikag.

Sadinno, kunam, sadinno ti pangarikapak
Iti bara ni ayat, daytay beggang dagiti agalimpatok
A seggam ken seggak? Sadinno, ay, sadinno? kunam
Ket mansuennak dagiti maar-arakattot a pakadak.

Ayna, agaludaid ta agaludaid ti mapadso a nakem.

Adu a didigra ti kasukat ti doliar, dinar,
Yen, ken kebbakebba. Iramanmo dita ti pangngadua
Nga ipasngay dagiti agsapa a diak kukua, dimo kukua,
Dita kukua. La ket ta agumbi dagiti agtaltalwataw met nga idda.

Ayabannaka ti punganko, ayabannaka ti ulesko, ti takiagko.

Payapayannaka ti angesko, ipayapayna a sireregget
Ti panagbilangta a panagpullo: sika iti iking dagiti kuadrado
A ragsak, siak iti sakaanan dagiti rektanggulo a paggaak.

Anian! Adda kadi sadiay dagiti narurungsot a bagyo?

Adda kadi sadiay dagiti makalmes a dalluyon?

Adda kadi sadiay dagiti di mangiginggina nga apr├Ęs
Nga agtunda iti dimmaga a langit, kas iti ayatmo
Iti ritual ti pannakaispal kadagiti baraha ti mammadto?

Ti gabat, pagsalaen ti nalibeg a danum iti exiliko nga un-unnoy.

Saan, kunaek koma kenka. Saannak a pabalonan iti arasaas.



Akliliakto daytoy kas iti pasarabo isu a dimon bungonen
Wenno yipit kadagiti kawesko wenno ipan kadagiti bulsito
Ti pagan-anay ti kinatao. Ketdi, pabalonannak
Iti ebanghelio ti panagsubli idi punganay kasta met ita.

Saan nga insegida. Wenno dardaras. Wenno asi-asi.
Saan a kas iti bendision ti sinanpadi nga agimpapadi.

Wenno uray ti pudno nga adipen ti Dios
A nagabito iti ranggas, gulib, allilaw, panagkigaw.
Nadamsak ti krus, kas iti basbas dagiti agmatuon iti rekkang.
Sadiay a matnag ti soltero nga aligagget, daytay karkarna
A rikna nga agkatangkatang iti di agapon nga agsipnget.
Iti sabali nga ili. Iti sabali a rupa dagiti aldaw wenno oras.

Ita nga aldaw, isuratko amin dagitoy iti heograpia ti saem.

Iti puso kas iti barukong. Ken iti linabag dagiti lagip ti agpatnag
Nga awanta kadagiti agsinanlubong a panagkammaysa
Dagiti mail-ila unay a lasag. Ti tamudom iti bibigko, kas pagarigan.
Ti aprosko kadagiti amin a panaglangan dagiti dakulap
Kadagiti sardam a diborsiado dagiti amin ng ayat.

-30-

A Solver Agcaoili
Hon, HI
Ag 2007

1 comment:

asseng said...

apong,

dumawatkami man iti pammalubos no mabalin nga ipablaakmi daytoy a daniwyo iti setiembre 24 a bilang ti bannawag.

dios ti agngina.

asseng